പ്രതീക്ഷിച്ചതിലും കരുത്തോടെ യുകെ സമ്പദ്‌വ്യവസ്ഥ; രണ്ടാം പാദത്തിൽ വളർച്ച 0.5 ശതമാനം
The UK economy grew by an upgraded 0.5% in the second quarter, outperforming initial expectations, though experts warn of tougher times ahead due to rising energy costs.
ലണ്ടൻ : യുകെ സമ്പദ്‌വ്യവസ്ഥയിൽ പ്രതീക്ഷിച്ചതിലും മികച്ച വളർച്ച രേഖപ്പെടുത്തിയതായി ഔദ്യോഗിക കണക്കുകൾ. ഓഫീസ് ഫോർ നാഷണൽ സ്റ്റാറ്റിസ്റ്റിക്‌സ് (ONS) പുറത്തുവിട്ട വിവരങ്ങൾ പ്രകാരം ഏപ്രിൽ മുതൽ ജൂൺ വരെയുള്ള രണ്ടാം പാദത്തിൽ ബ്രിട്ടന്റെ മൊത്ത ആഭ്യന്തര ഉൽപ്പാദനം (GDP) 0.5 ശതമാനം വളർച്ച കൈവരിച്ചു. നേരത്തെ കണക്കാക്കിയിരുന്ന 0.4 ശതമാനത്തിൽ നിന്നാണ് വളർച്ച നിരക്ക് ഉയർത്തിയത്. സേവന മേഖലയിലെ മികച്ച പ്രകടനമാണ് സമ്പദ്‌വ്യവസ്ഥയ്ക്ക് തുണയായത്.
വേനൽക്കാലത്തെ മികച്ച വിപണി സാഹചര്യങ്ങളും വേൾഡ് കപ്പ് ഫുട്ബോൾ മത്സരങ്ങളും വ്യാപാര മേഖലയ്ക്ക് ഉണർവേകിയതായി റിപ്പോർട്ടിൽ വ്യക്തമാക്കുന്നു. വർഷത്തിന്റെ ആദ്യ മൂന്ന് മാസങ്ങളിൽ 0.6 ശതമാനമായിരുന്നു രാജ്യത്തിന്റെ സാമ്പത്തിക വളർച്ച. എന്നാൽ മുൻ വർഷത്തെ (2025) മൊത്തത്തിലുള്ള വാർഷിക വളർച്ചാ നിരക്ക് നേരത്തെ കണക്കാക്കിയ 1.3 ശതമാനത്തിൽ നിന്ന് 1.2 ശതമാനമായി ONS പുതുക്കി നിശ്ചയിച്ചിട്ടുണ്ട്.
നിലവിൽ സമ്പദ്‌വ്യവസ്ഥ കരുത്ത് കാട്ടുന്നുണ്ടെങ്കിലും വരും മാസങ്ങളിൽ സ്ഥിതി വെല്ലുവിളി നിറഞ്ഞതാകുമെന്നാണ് സാമ്പത്തിക വിദഗ്ധരുടെ മുന്നറിയിപ്പ്. അന്താരാഷ്ട്ര സംഘർഷങ്ങളെത്തുടർന്ന് ഇന്ധന-ഊർജ വിലയിലുണ്ടാകുന്ന വർധനവും വരാനിരിക്കുന്ന ബജറ്റിലെ അനിശ്ചിതത്വങ്ങളും കുടുംബങ്ങളുടെ ചെലവഴിക്കലിനെയും തുടർവളർച്ചയെയും സാരമായി ബാധിച്ചേക്കാം. ജനുവരിയോടെ ഗാർഹിക ഊർജ ബില്ലുകളിൽ വൻ വർധനവുണ്ടാകുമെന്നും വിദഗ്ധർ ചൂണ്ടിക്കാട്ടുന്നു.
