യുകെ സ്ഥിരതാമസത്തിന് 10 വർഷം കാത്തിരിക്കേണ്ടിവരുമോ? എതിർപ്പുമായി 80 ലേബർ എംപിമാർ

ലണ്ടൻ : യുകെയിൽ കുടിയേറ്റക്കാർക്ക് സ്ഥിരതാമസ പദവിയായ ഇൻഡെഫിനിറ്റ് ലീവ് ടു റിമെയ്ൻ ലഭിക്കാൻ ആവശ്യമായ കാലാവധി അഞ്ച് വർഷത്തിൽ നിന്ന് പത്ത് വർഷമാക്കി ഉയർത്താനുള്ള നിർദേശത്തിനെതിരെ ലേബർ പാർട്ടിക്കുള്ളിൽ ശക്തമായ എതിർപ്പ്. ഏകദേശം 80 ലേബർ എംപിമാർ നിർദിഷ്ട മാറ്റം പുനഃപരിശോധിക്കണമെന്ന് ആവശ്യപ്പെട്ട് രംഗത്തെത്തിയിട്ടുണ്ട്. ആൻഡി ബേൺഹാം പ്രധാനമന്ത്രിയാകാൻ ഒരുങ്ങുന്നതിനിടെ, അദ്ദേഹം നേരിടേണ്ടിവരുന്ന ആദ്യത്തെ പ്രധാന ആഭ്യന്തര വെല്ലുവിളികളിലൊന്നായി കുടിയേറ്റനയം മാറിയിരിക്കുകയാണ്.

ആഭ്യന്തരമന്ത്രി ഷബാന മഹ്മൂദ് മുന്നോട്ടുവച്ച നിർദേശപ്രകാരം, ചില കുടിയേറ്റക്കാർക്ക് സ്ഥിരതാമസത്തിന് അർഹത നേടാനുള്ള അടിസ്ഥാന കാലാവധി പത്ത് വർഷമായി ഉയർന്നേക്കും. തൊഴിൽ, നികുതി അടവ്, പൊതുസേവനത്തിനുള്ള സംഭാവന തുടങ്ങിയ മാനദണ്ഡങ്ങൾ പരിഗണിച്ച് ചിലർക്ക് കുറഞ്ഞ സമയത്തിനുള്ളിൽ സ്ഥിരതാമസം നേടാൻ അവസരം നൽകുന്ന ‘earned settlement’ സംവിധാനവും പരിഗണനയിലുണ്ട്.

റിഫോം യുകെയുടെ കടുത്ത കുടിയേറ്റ സമീപനം അനുകരിക്കാൻ ലേബർ പാർട്ടി ശ്രമിക്കരുതെന്നാണ് എതിർപ്പുയർത്തുന്ന എംപിമാരുടെ നിലപാട്. ഇതിനകം നിയമാനുസൃതമായി യുകെയിൽ താമസിക്കുകയും ജോലി ചെയ്യുകയും ചെയ്യുന്നവരുടെ ജീവിതപദ്ധതികളെ പിന്നീടുള്ള നയമാറ്റം ബാധിക്കരുതെന്നും അവർ ആവശ്യപ്പെടുന്നു. അതേസമയം നിർദേശം ഇതുവരെ അന്തിമ നിയമമായി മാറിയിട്ടില്ല. പുതിയ സർക്കാർ ഔദ്യോഗിക തീരുമാനം പ്രഖ്യാപിക്കുന്നതുവരെ നിലവിലുള്ള വിസ, സ്ഥിരതാമസ നിയമങ്ങളും ഹോം ഓഫീസ് മാർഗനിർദേശങ്ങളുമാണ് പ്രാബല്യത്തിലുള്ളത്.

English Summary: Nearly 80 Labour MPs have urged Andy Burnham to reconsider proposals that could double the standard UK settlement period from five to ten years.