യുകെയിൽ മൂന്ന് കുട്ടികളുടെ അമ്മയായ വനിതാ ഡോക്ടറുടെ കൊലപാതകം: 45-കാരനെതിരെ കൊലക്കുറ്റം ചുമത്തി
A 45-year-old man named Mark Cain has been charged with the murder of Dr Hannah Cain, a GP and mother of three who was found dead at her home in Norfolk.
ലണ്ടൻ : യുകെയിലെ നോർഫോക്കിൽ സാൻഡ്രിങ്ഹാം എസ്റ്റേറ്റിന് സമീപം സ്വന്തം വസതിയിൽ മൂന്ന് കുട്ടികളുടെ അമ്മയായ വനിതാ ഡോക്ടറെ മരിച്ച നിലയിൽ കണ്ടെത്തിയ സംഭവത്തിൽ 45-കാരനെതിരെ പോലീസ് കൊലക്കുറ്റം ചുമത്തി. ഡെർസിങ്ഹാമിലെ ഫേൺ ഹിൽ സ്വദേശിയായ മാർക്ക് കെയ്ൻ (45) എന്നയാളെയാണ് ഡോ. ഹന്ന കെയ്‌നിന്റെ (പ്രൊഫഷണലായി ഡോ. ഹന്ന ടെറി എന്നറിയപ്പെടുന്നു) കൊലപാതകവുമായി ബന്ധപ്പെട്ട് അറസ്റ്റ് ചെയ്തത്. ഒക്ടോബർ നാലിന് പുലർച്ചെയാണ് ഡോക്ടറുടെ മൃതദേഹം വീട്ടിൽ കണ്ടെത്തിയത്.
ഗ്രിംസ്റ്റൺ മെഡിക്കൽ സെന്ററിലെ ജനറൽ പ്രാക്ടീഷണറായി (GP) സേവനമനുഷ്ഠിച്ചു വരികയായിരുന്നു 45-കാരിയായ ഡോ. ഹന്ന. സംഭവം നടക്കുമ്പോൾ കുട്ടികളുടെ സ്ലീപ് ഓവർ പാർട്ടിക്കായി സുഹൃത്തുക്കളും വീട്ടിലുണ്ടായിരുന്നുവെന്നാണ് വിവരം. കേസിൽ നോർഫോക്ക് പോലീസുമായി ചേർന്ന് വിശദമായ അന്വേഷണം പൂർത്തിയാക്കിയ ശേഷമാണ് മാർക്ക് കെയ്നെതിരെ കൊലപാതകത്തിന് കേസെടുക്കാൻ ക്രൗൺ പ്രോസിക്യൂഷൻ സർവീസ് (CPS) തീരുമാനിച്ചതെന്ന് ഉദ്യോഗസ്ഥനായ മൈക്കൽ ഡെവാനി അറിയിച്ചു.
പ്രതിയായ മാർക്ക് കെയ്നെ നിലവിൽ കസ്റ്റഡിയിൽ സൂക്ഷിച്ചിരിക്കുകയാണെന്നും ഒക്ടോബർ ഏഴിന് നോർവിച്ച് മജിസ്‌ട്രേറ്റ് കോടതിയിൽ ഹാജരാക്കുമെന്നും പോലീസ് വ്യക്തമാക്കി. ഡോക്ടറുടെ അപ്രതീക്ഷിത വിയോഗത്തിൽ കുടുംബം കടുത്ത മാനസിക വിഷമത്തിലാണെന്നും അവർക്ക് ആവശ്യമായ സ്വകാര്യത നൽകണമെന്നും പോലീസ് അഭ്യർത്ഥിച്ചു. പ്രത്യേക പരിശീലനം ലഭിച്ച ഉദ്യോഗസ്ഥരുടെ പിന്തുണ കുടുംബത്തിന് നൽകുന്നുണ്ട്.
