ഇംഗ്ലണ്ട് പതാകകൾ സ്ഥാപിക്കുന്ന സംഘത്തിന് ബർമിംഗ്ഹാം കൗൺസിൽ ‘സ്വതന്ത്ര ഇടം’ നൽകുന്നതായി വിമർശനം

ലണ്ടൻ : ബർമിംഗ്ഹാം നഗരത്തിലെ തെരുവുവിളക്കുകളിലും റൗണ്ടബൗട്ടുകളിലും മറ്റ് പൊതുസൗകര്യങ്ങളിലും ഇംഗ്ലണ്ട് പതാകകളും യൂണിയൻ ജാക്കും അനുമതിയില്ലാതെ സ്ഥാപിക്കുന്ന ‘റെയ്‌സ് ദ കളേഴ്‌സ്’ സംഘത്തിനെതിരെ നടപടി വൈകിപ്പിക്കുന്നതായി ബർമിംഗ്ഹാം സിറ്റി കൗൺസിലിനും വെസ്റ്റ് മിഡ്‌ലാൻഡ്സ് പൊലീസിനുമെതിരെ പ്രദേശവാസികളുടെ വിമർശനം. രാജ്യസ്നേഹവും ഐക്യവും പ്രചരിപ്പിക്കുകയാണ് ലക്ഷ്യമെന്ന് സംഘം അവകാശപ്പെടുന്നുണ്ടെങ്കിലും, കുടിയേറ്റവിരുദ്ധ പ്രചാരണവും ഭീഷണിപ്പെടുത്തലും നടത്തുന്നതായി ചില പ്രാദേശിക സംഘടനകൾ ആരോപിക്കുന്നു. എന്നാൽ വംശീയതയുമായി ബന്ധപ്പെട്ട ആരോപണങ്ങൾ സംഘം നിഷേധിച്ചിട്ടുണ്ട്.

സംഘത്തിന്റെ പ്രവർത്തനങ്ങൾ തടയാൻ കോടതിവിലക്ക് തേടണമെന്ന് ആവശ്യപ്പെട്ട് ‘ബ്രമ്മീസ് യുണൈറ്റഡ് എഗെയിൻസ്റ്റ് റേസിസം’ ഉൾപ്പെടെയുള്ള സംഘടനകൾ കഴിഞ്ഞ ആറുമാസമായി കൗൺസിലുമായും പൊലീസ് ആൻഡ് ക്രൈം കമ്മീഷണറുമായും ചർച്ച നടത്തിവരികയാണ്. സംഘവുമായി ബന്ധപ്പെട്ടുവെന്ന് ആരോപിക്കപ്പെടുന്ന ഭീഷണികൾ, ഏറ്റുമുട്ടലുകൾ, വ്യക്തിവിവരങ്ങൾ ഓൺലൈനിൽ പ്രസിദ്ധീകരിക്കൽ തുടങ്ങിയ സംഭവങ്ങളുടെ ദൃശ്യങ്ങളും മൊഴികളും അധികൃതർക്ക് കൈമാറിയതായി പ്രവർത്തകർ പറഞ്ഞു. മേയിൽ പതാകകൾ നീക്കംചെയ്യാൻ എത്തിയവർക്ക് നേരെയുണ്ടായ വാഹനമിടിച്ചോടിക്കൽ സംഭവത്തിൽ ഒരാൾക്ക് ഗുരുതരമായി പരിക്കേറ്റിരുന്നു. കേസുമായി ബന്ധപ്പെട്ട് അറസ്റ്റിലായ രണ്ടുപേരെ പിന്നീട് ജാമ്യത്തിൽ വിട്ടതായി പൊലീസ് അറിയിച്ചു.

ഓക്സ്ഫോർഡ്ഷയർ കൗണ്ടി കൗൺസിൽ സമാന സംഭവങ്ങളിൽ ഹൈക്കോടതിയിൽ നിന്ന് വിലക്ക് നേടിയതിനെ ചൂണ്ടിക്കാട്ടിയാണ് ബർമിംഗ്ഹാമിലും അടിയന്തര നടപടി വേണമെന്ന് പ്രദേശവാസികൾ ആവശ്യപ്പെടുന്നത്. അനുമതിയില്ലാതെ പൊതുസൗകര്യങ്ങളിൽ പതാകകൾ സ്ഥാപിക്കുന്നത് അനുവദനീയമല്ലെന്നും ഇത്തരം വസ്തുക്കൾ നീക്കംചെയ്യുമെന്നും ബർമിംഗ്ഹാം സിറ്റി കൗൺസിൽ വ്യക്തമാക്കി. പതാകകളുമായി ബന്ധപ്പെട്ട പ്രവർത്തനങ്ങൾ ചില പ്രദേശങ്ങളിൽ സംഘർഷാവസ്ഥ വർധിപ്പിച്ചതായി സമ്മതിച്ച കൗൺസിൽ, ജനങ്ങൾ ഉത്തരവാദിത്വത്തോടെയും പരസ്പര ബഹുമാനത്തോടെയും പെരുമാറണമെന്ന് അഭ്യർഥിച്ചു. നിയമവിരുദ്ധ പ്രവർത്തനങ്ങൾ, ഭീഷണിപ്പെടുത്തൽ, പൊതുസമാധാന ലംഘനം എന്നിവ തടയാൻ ശക്തമായ നടപടി വേണമെന്ന് വെസ്റ്റ് മിഡ്‌ലാൻഡ്സ് പൊലീസ് ആൻഡ് ക്രൈം കമ്മീഷണറും ആവശ്യപ്പെട്ടു.

English Summary: Birmingham residents have urged authorities to act against unauthorised flag installations amid allegations of intimidation and rising community tensions.