യുകെയിൽ ഇ-സ്കൂട്ടർ അപകടങ്ങളിൽ കുട്ടികൾക്ക് പരിക്ക് വർധിക്കുന്നു; 2019 മുതൽ 500ഓളം പേർക്ക് പരിക്ക്

ലണ്ടൻ : ഇംഗ്ലണ്ടിൽ ഇ-സ്കൂട്ടർ അപകടങ്ങളിൽ കുട്ടികൾക്ക് പരിക്കേൽക്കുന്ന സംഭവങ്ങൾ ആശങ്കാജനകമായി വർധിക്കുന്നതായി പുതിയ പഠനം. 2019 മുതൽ 2024 അവസാനം വരെ മൂന്ന് കുട്ടികളുടെ ട്രോമ സെന്ററുകളിൽ 477 ഇ-സ്കൂട്ടർ പരിക്കുകൾ രേഖപ്പെടുത്തിയതായി Emergency Medicine Journalൽ പ്രസിദ്ധീകരിച്ച പഠനം വ്യക്തമാക്കുന്നു. പരിക്കേറ്റ കുട്ടികളുടെ ശരാശരി പ്രായം 12 ആയിരുന്നു. അപകടസമയത്ത് ഹെൽമെറ്റ് ധരിച്ചിരുന്നത് വെറും 1.8 ശതമാനം കുട്ടികൾ മാത്രമാണെന്നും പഠനം കണ്ടെത്തി.

പരിക്കുകളുടെ 95 ശതമാനവും ഇ-സ്കൂട്ടർ ഓടിച്ചിരുന്ന കുട്ടികൾക്കായിരുന്നു. 80 ശതമാനം അപകടങ്ങളിലും സ്വകാര്യ ഉടമസ്ഥതയിലുള്ള ഇ-സ്കൂട്ടറുകളാണ് ഉൾപ്പെട്ടിരുന്നത്. കൈകാലുകൾക്കായിരുന്നു കൂടുതലായും പരിക്ക്, എന്നാൽ 24.1 ശതമാനം കുട്ടികൾക്ക് തലക്ക് പരിക്കേറ്റു. തലക്ക് പരിക്കേറ്റവരിൽ ചിലർക്ക് സ്കാൻ, ആശുപത്രി പ്രവേശനം, ശസ്ത്രക്രിയ എന്നിവ ആവശ്യമായി വന്നു. ഗുരുതരമായി പരിക്കേറ്റ കുട്ടികളിൽ 48 ശതമാനം പേർ കാർ അല്ലെങ്കിൽ നിശ്ചല വസ്തുക്കളുമായി കൂട്ടിയിടിച്ചാണ് അപകടത്തിൽപ്പെട്ടത്. പരിക്കേറ്റവരിൽ പകുതിയോളം 10നും 13നും ഇടയിൽ പ്രായമുള്ളവരായിരുന്നു.

യുകെയിൽ ഇ-സ്കൂട്ടറുകളുമായി ബന്ധപ്പെട്ട് ഇതുവരെ 59 മരണങ്ങൾ റിപ്പോർട്ട് ചെയ്തിട്ടുണ്ടെന്നും അതിൽ 10 പേർ 18 വയസ്സിന് താഴെയുള്ളവരാണെന്നും പഠനം പറയുന്നു. സ്വകാര്യ ഇ-സ്കൂട്ടറുകൾ റോഡുകളിലും നടപ്പാതകളിലും മറ്റ് പൊതുസ്ഥലങ്ങളിലും ഉപയോഗിക്കുന്നത് നിലവിൽ നിയമവിരുദ്ധമാണ്, എന്നാൽ ചില നഗരങ്ങളിൽ സർക്കാർ പരീക്ഷണ പദ്ധതിയുടെ ഭാഗമായി വാടക ഇ-സ്കൂട്ടറുകൾ അനുവദിച്ചിട്ടുണ്ട്. സുരക്ഷിതവും നിയമപരവുമായ ഉപയോഗത്തിനായി ഹെൽമെറ്റ് ഉൾപ്പെടെയുള്ള പുതിയ നിബന്ധനകൾ പരിഗണിച്ചുകൊണ്ട് നിയമപരിഷ്‌കരണ നടപടികൾ മുന്നോട്ട് കൊണ്ടുപോകുകയാണെന്ന് Department for Transport അറിയിച്ചു.

English summary: Nearly 500 children in England have been injured in e-scooter incidents since 2019, with helmet use found to be extremely low.