യുകെയിൽ ഇന്ന് പതിറ്റാണ്ടുകളിലെ ഏറ്റവും ശ്രദ്ധേയമായ സൂര്യഗ്രഹണം; സൂര്യന്റെ 90 ശതമാനത്തിലേറെ മറയും

ലണ്ടൻ : യുകെയിൽ ഇന്ന് വൈകുന്നേരം പതിറ്റാണ്ടുകളിലെ ഏറ്റവും ശ്രദ്ധേയമായ സൂര്യഗ്രഹണം ദൃശ്യമാകും. വൈകിട്ട് 6.17 മുതൽ രാത്രി 8.06 വരെ നീളുന്ന ഭാഗിക സൂര്യഗ്രഹണത്തിൽ രാജ്യത്തിന്റെ പല ഭാഗങ്ങളിലും സൂര്യന്റെ 90 ശതമാനത്തിലേറെ ചന്ദ്രൻ മറയ്ക്കും. 1999ന് ശേഷം യുകെ ആകാശത്ത് കാണുന്ന ഏറ്റവും ശക്തമായ ഗ്രഹണാനുഭവമായിരിക്കും ഇത്. കോൺവാളിൽ സൂര്യന്റെ ഏകദേശം 95 ശതമാനവും ലണ്ടനിൽ 90 ശതമാനത്തോളം ഭാഗവും മറയുമെന്നാണ് കണക്കാക്കുന്നത്. പൂർണ ഇരുട്ടാകില്ലെങ്കിലും വെളിച്ചവും താപനിലയും കുറയുകയും സന്ധ്യാസമയത്തിന് സമാനമായ അന്തരീക്ഷം അനുഭവപ്പെടുകയും ചെയ്യാം.

ഗ്രഹണം നേരിട്ട് കാണാൻ സാധാരണ സൺഗ്ലാസ് ഉപയോഗിക്കരുതെന്ന് വിദഗ്ധർ മുന്നറിയിപ്പ് നൽകി. ISO 12312-2 നിലവാരമുള്ള പ്രത്യേക solar eclipse glasses മാത്രം ഉപയോഗിക്കണമെന്നാണ് നിർദേശം. 1999ലെ ഗ്രഹണത്തിന് ശേഷം നേരിട്ട് സൂര്യനെ നോക്കിയതിനെ തുടർന്ന് നിരവധി ആളുകൾക്ക് കാഴ്ച സംബന്ധമായ പ്രശ്നങ്ങൾ റിപ്പോർട്ട് ചെയ്തിരുന്നു. കണ്ണിന്റെ റെറ്റിനയ്ക്ക് സംഭവിക്കുന്ന കേടുപാടുകൾ ഉടൻ വേദനയായി അനുഭവപ്പെടണമെന്നില്ലെന്നും പിന്നീട് മങ്ങിയ കാഴ്ച, കറുത്ത പാട്, നിറങ്ങൾ തിരിച്ചറിയുന്നതിലെ കുറവ് തുടങ്ങിയ ലക്ഷണങ്ങൾ വരാമെന്നും Royal College of Ophthalmologists മുന്നറിയിപ്പ് നൽകി. ക്യാമറയിലൂടെയോ ടെലിഫോട്ടോ ലെൻസിലൂടെയോ ചിത്രമെടുക്കുന്നവരും അംഗീകൃത solar filter ഉപയോഗിക്കണം.

അതേസമയം, ഗ്രഹണ സമയത്ത് ബ്രിട്ടന്റെ സൗരോർജ ഉൽപാദനത്തിൽ താൽക്കാലിക കുറവ് വരാൻ സാധ്യതയുള്ളതിനാൽ വൈദ്യുതി ഉപയോഗം കുറയ്ക്കണമെന്ന് Octopus Energy ഉപഭോക്താക്കളോട് അഭ്യർത്ഥിച്ചിട്ടുണ്ട്. യുകെയിൽ ഇത് ഭാഗിക ഗ്രഹണമാകുമ്പോൾ ഗ്രീൻലാൻഡ്, ഐസ്‌ലാൻഡ്, വടക്കൻ സ്പെയിൻ, ബാലിയാറിക് ദ്വീപുകൾ ഉൾപ്പെടുന്ന ചില പ്രദേശങ്ങളിൽ പൂർണ സൂര്യഗ്രഹണം കാണാം. ഇന്നിറാവ് Perseid meteor shower ഉം പരമാവധി ശക്തിയിലെത്തുന്നതിനാൽ ആകാശനിരീക്ഷകർക്ക് ഇരട്ട വിരുന്നായിരിക്കും. അനുയോജ്യമായ സാഹചര്യങ്ങളിൽ മണിക്കൂറിൽ 50 മുതൽ 100 വരെ ഉൽക്കകൾ കാണാമെന്നും യുകെയിൽ അർധരാത്രി മുതൽ പുലർച്ചെ 5.30 വരെയാണ് മികച്ച സമയം എന്നും NASA അറിയിച്ചു.

English summary: The UK is set to witness its most dramatic partial solar eclipse since 1999, followed by the peak of the Perseid meteor shower.