ഇമിഗ്രേഷൻ നയത്തിൽ ലേബർ സർക്കാരിനകത്ത് ഭിന്നത; ടാപ്പ്–മഹ്മൂദ് തർക്കം രൂക്ഷം

ലണ്ടൻ : യുകെയിലെ ഇമിഗ്രേഷൻ നയങ്ങളെച്ചൊല്ലി ഭരണകക്ഷിയായ ലേബർ പാർട്ടിയിൽ ആഭ്യന്തര തർക്കം രൂക്ഷമാകുന്നു. ഇമിഗ്രേഷൻ മന്ത്രി മൈക്ക് ടാപ്പും ആഭ്യന്തര സെക്രട്ടറി ഷബാന മഹ്മൂദും തമ്മിലുള്ള ഭിന്നതയാണ് ഇപ്പോൾ രാഷ്ട്രീയ വിവാദമായി മാറിയത്. മൈക്ക് ടാപ്പിനെ മന്ത്രിസ്ഥാനത്ത് നിന്ന് മാറ്റണമെന്ന ആവശ്യം ഉയർന്നതായുള്ള റിപ്പോർട്ടുകൾ പുറത്തുവന്നതിന് പിന്നാലെ താൻ സമ്മർദ്ദങ്ങൾക്ക് വഴങ്ങില്ലെന്ന് ടാപ്പ് വ്യക്തമാക്കിയിട്ടുണ്ട്. ഇമിഗ്രേഷൻ നയത്തെക്കുറിച്ച് മുൻകൂർ അനുമതിയില്ലാതെ മൈക്ക് ടാപ്പ് പത്രത്തിൽ ലേഖനം എഴുതിയതാണ് തർക്കം രൂക്ഷമാക്കിയത്. യുകെയിൽ അനധികൃതമായി എത്തുന്നവർക്ക് സ്ഥിരതാമസാവകാശം ലഭിക്കുന്നതിന് കൂടുതൽ കർശനമായ കാലപരിധി വേണമെന്ന നിലപാടാണ് അദ്ദേഹം മുന്നോട്ടുവച്ചത്. ഇത് ആഭ്യന്തര സെക്രട്ടറിയുടെ നയങ്ങളുമായി പൊരുത്തപ്പെടുന്നില്ലെന്നാണ് വിമർശനം. വിവാദം കടുത്തതോടെ ടാപ്പിന് പ്രധാനപ്പെട്ട രേഖകൾ കാണാനും ചില യോഗങ്ങളിൽ പങ്കെടുക്കാനും പ്രത്യേക അനുമതി വേണമെന്ന നിയന്ത്രണങ്ങൾ ഏർപ്പെടുത്തിയതായും റിപ്പോർട്ടുകളുണ്ട്. ഇമിഗ്രേഷൻ നിയമങ്ങളിൽ മാറ്റം വരാനിരിക്കുന്ന സമയത്താണ് ഈ ഭിന്നത പുറത്തുവന്നിരിക്കുന്നത്. കെയർ വർക്കർമാർ ഉൾപ്പെടെയുള്ള പ്രവാസികളുടെ ഭാവിയെ ബാധിക്കുന്ന വിഷയമായതിനാൽ യുകെയിലെ മലയാളി സമൂഹവും ഈ സംഭവവികാസങ്ങൾ ശ്രദ്ധിക്കുകയാണ്. English Summary: A row between Mike Tapp and Shabana Mahmood has exposed divisions inside Labour over immigration policy.