യുകെയിൽ നാലാമത്തെ ഉഷ്ണതരംഗം അടുത്താഴ്ച; 30 ഡിഗ്രിക്ക് മുകളിലേക്ക് ചൂട് ഉയരും

ലണ്ടൻ : യുകെയിൽ അടുത്താഴ്ച ഈ വേനലിലെ നാലാമത്തെ ഉഷ്ണതരംഗം അനുഭവപ്പെടാനിടയുണ്ടെന്ന് കാലാവസ്ഥാ മുന്നറിയിപ്പ്. വാരാന്ത്യത്തിൽ താപനിലയിൽ ചെറിയ കുറവ് ഉണ്ടായ ശേഷമാണ് വീണ്ടും ചൂട് ശക്തമാകുന്നത്. തിങ്കളാഴ്ച സൗത്ത് ഈസ്റ്റിൽ 27 ഡിഗ്രി സെൽഷ്യസ് വരെ ഉയരാനാണ് സാധ്യത. ചൊവ്വാഴ്ച മുതൽ വ്യാഴാഴ്ച വരെ സൗത്ത് ഈസ്റ്റ് ഉൾപ്പെടെയുള്ള പ്രദേശങ്ങളിൽ താപനില 30 ഡിഗ്രിക്ക് മുകളിലെത്തുമെന്നും ചില മേഖലകളിൽ ഔദ്യോഗിക ഉഷ്ണതരംഗ പരിധി കടക്കുമെന്നും പ്രവചിക്കുന്നു. ഈസ്റ്റ് മിഡ്‌ലാൻഡ്സ്, ഈസ്റ്റ് ഓഫ് ഇംഗ്ലണ്ട്, ലണ്ടൻ, സൗത്ത് ഈസ്റ്റ്, സൗത്ത് വെസ്റ്റ്, വെസ്റ്റ് മിഡ്‌ലാൻഡ്സ് എന്നിവിടങ്ങളിൽ ആരോഗ്യത്തെ ബാധിക്കാവുന്ന ചൂടിനെ തുടർന്ന് യെല്ലോ ഹീറ്റ് അലർട്ടും പ്രഖ്യാപിച്ചിട്ടുണ്ട്.

അതിനിടെ, രാജ്യത്തിന്റെ ചില ഭാഗങ്ങളിൽ തണുത്തതും മഴയോടുകൂടിയതുമായ കാലാവസ്ഥ ലഭിച്ചേക്കുമെങ്കിലും വെയിൽച്ചൂടും വരൾച്ചയും രൂക്ഷമായ വെയിൽസ്, തെക്കൻ ഇംഗ്ലണ്ട് എന്നിവിടങ്ങളിൽ കാര്യമായ മഴ ലഭിക്കാനുള്ള സാധ്യത കുറവാണെന്ന് കാലാവസ്ഥാ വിദഗ്ധർ പറയുന്നു. നോർത്ത് വെയിൽസിലും അപ്പർ സെവേൺ മേഖലയിലും വരൾച്ച ഔദ്യോഗികമായി പ്രഖ്യാപിച്ചിട്ടുണ്ട്. ബെഡ്‌ഫോർഡ്ഷയർ, ബക്കിംഗ്ഹാംഷയർ, ഹെർട്ഫോർഡ്ഷയർ, വെസ്റ്റ് സസെക്സ് എന്നിവിടങ്ങളിൽ ജൂലൈയിൽ ഇതുവരെ മഴ രേഖപ്പെടുത്തിയിട്ടില്ല. രാജ്യത്ത് സാധാരണയായി ലഭിക്കേണ്ട ജൂലൈ മഴയുടെ 20 ശതമാനം മാത്രമാണ് ലഭിച്ചതെന്നും ഇത്രയും നീണ്ട ചൂടും വരണ്ട കാലാവസ്ഥയും അപൂർവമാണെന്നും മെറ്റ് ഓഫീസ് വ്യക്തമാക്കി.

ഓഗസ്റ്റിലേക്കു കടക്കുമ്പോൾ കാലാവസ്ഥ വീണ്ടും സ്ഥിരതയാർജിച്ച് കൂടുതൽ വരണ്ടതാകാനുള്ള സൂചനകളുണ്ടെന്നും അതിനാൽ അടുത്താഴ്ചത്തേതു വേനലിലെ അവസാന ഉഷ്ണതരംഗമായിരിക്കണമെന്നില്ലെന്നും ദീർഘകാല പ്രവചനം മുന്നറിയിപ്പ് നൽകുന്നു. അതേസമയം, സ്കോട്ട്ലൻഡിലെ കെയർംഗോംസ് ദേശീയോദ്യാനം, നോർത്ത് വെയിൽസിലെ റൈനോഗിഡ് മലനിരകൾ, സൗത്ത് വെയിൽസിലെ ബ്ലൈനാവോൺ എന്നിവിടങ്ങളിൽ കാട്ടുതീ തുടരുകയാണ്. ഐൽ ഓഫ് വൈറ്റ്, ന്യൂ ഫോറസ്റ്റ്, ഹാംഷയറിലെ ടാഡ്ലി എന്നിവിടങ്ങളിലും സമീപകാലത്ത് തീപിടിത്തങ്ങൾ റിപ്പോർട്ട് ചെയ്തിട്ടുണ്ട്.

English summary: The UK is set for a fourth heatwave, with temperatures above 30C and further hot spells possible in August.