യുകെ സർവകലാശാലകളിൽ വൻ ഫീസ് വർദ്ധനവ്; വിദേശ വിദ്യാർത്ഥികൾക്ക് വൻ തിരിച്ചടി
ലണ്ടൻ : യുകെയിലെ പ്രമുഖ സർവകലാശാലകളിൽ അന്താരാഷ്ട്ര ബിരുദ വിദ്യാർത്ഥികളുടെ ട്യൂഷൻ ഫീസിൽ വൻ വർദ്ധനവ് നടപ്പിലാക്കാൻ ഒരുങ്ങുന്നതായി റിപ്പോർട്ടുകൾ വ്യക്തമാക്കുന്നു. വരുന്ന നാല് വർഷത്തിനുള്ളിൽ ഫീസിൽ 29 ശതമാനം വരെ വർദ്ധനവ് വരുത്താനാണ് മുൻനിര സർവകലാശാലകൾ പദ്ധതിയിടുന്നത്. ഫിനാൻഷ്യൽ ടൈംസ് പുറത്തുവിട്ട വിശകലന റിപ്പോർട്ടുകൾ പ്രകാരം, പ്രശസ്തമായ കേംബ്രിഡ്ജ് സർവകലാശാലയിൽ ഈ ശരത്കാലം മുതൽ മെഡിസിൻ കോഴ്സിന് ചേരുന്ന വിദേശ വിദ്യാർത്ഥികൾ തങ്ങളുടെ ആറ് വർഷത്തെ പഠനത്തിനായി കുറഞ്ഞത് 4,56,000 പൗണ്ട് ട്യൂഷൻ ഫീസായി മാത്രം നൽകേണ്ടി വരും.
യുകെയിലെ സ്വദേശികളായ വിദ്യാർത്ഥികൾക്ക് ഫീസ് നിരക്കുകൾ കൃത്യമായി നിജപ്പെടുത്തിയിട്ടുണ്ടെങ്കിലും വിദേശത്തുനിന്നും എത്തുന്നവർക്ക് ഓരോ കോഴ്സിനും സ്ഥാപനങ്ങൾക്കും അനുസരിച്ച് ഫീസിൽ വലിയ വ്യത്യാസമുണ്ട്. മുൻനിര സർവകലാശാലകളിൽ പഠിക്കുന്ന വിദേശ വിദ്യാർത്ഥികളുടെ ശരാശരി വാർഷിക ട്യൂഷൻ ഫീസ് 2028-29 ഓടെ ഏകദേശം 34,700 പൗണ്ടായി ഉയരുമെന്നാണ് കണക്കാക്കുന്നത്. കേംബ്രിഡ്ജിൽ മെഡിസിൻ, കമ്പ്യൂട്ടർ സയൻസ്, എഞ്ചിനീയറിംഗ് തുടങ്ങിയ പ്രമുഖ കോഴ്സുകൾക്ക് സ്വദേശി വിദ്യാർത്ഥികളേക്കാൾ ഒൻപത് മടങ്ങ് വരെ ഉയർന്ന തുകയാണ് വിദേശ വിദ്യാർത്ഥികളിൽ നിന്ന് ഈടാക്കുന്നത്. ഓക്സ്ഫോർഡ് സർവകലാശാലയിലും സയൻസ്, എഞ്ചിനീയറിംഗ് കോഴ്സുകളുടെ വാർഷിക ഫീസ് 62,820 പൗണ്ടായി വർദ്ധിച്ചിട്ടുണ്ട്. തുക ഉയർന്നതോടെ സാധാരണക്കാരായ അന്താരാഷ്ട്ര വിദ്യാർത്ഥികൾക്ക് യുകെയിലെ പ്രമുഖ സർവകലാശാലകളിലെ പഠനം ഇനി കടുത്ത സാമ്പത്തിക ബാധ്യതയാകും.
സ്വദേശി വിദ്യാർത്ഥികളുടെ ട്യൂഷൻ ഫീസ് വർഷങ്ങളായി മരവിപ്പിച്ചു നിർത്തിയതുമൂലം ഉണ്ടായ സാമ്പത്തിക പ്രതിസന്ധി മറികടക്കാനാണ് സർവകലാശാലകൾ വിദേശ വിദ്യാർത്ഥികളെ വലിയ തോതിൽ ആശ്രയിക്കുന്നത്. ഈ ഫീസ് വർദ്ധനവ് സാധാരണക്കാർക്ക് വലിയ ഞെട്ടലുണ്ടാക്കുന്നതാണെങ്കിലും, ആഗോളതലത്തിൽ മുൻപന്തിയിൽ നിൽക്കുന്ന ഇത്തരം പ്രമുഖ സ്ഥാപനങ്ങളിലെ കോഴ്സുകൾക്ക് ആവശ്യക്കാർ ഏറെയായതിനാലാണ് ഫീസ് ഉയർത്തുന്നതെന്ന് വിദഗ്ദ്ധർ ചൂണ്ടിക്കാണിക്കുന്നു. ഉയർന്ന ഫീസിൽ നിന്നുള്ള വരുമാനമാണ് സർവകലാശാലകളിലെ ഗവേഷണങ്ങൾക്കും ഉയർന്ന നിലവാരം നിലനിർത്തുന്നതിനും ഉപയോഗിക്കുന്നത്. വിദേശ വിദ്യാർത്ഥികളിൽ നിന്നുള്ള വരുമാനം യുകെയുടെ ഉന്നത വിദ്യാഭ്യാസ മേഖലയുടെ നിലനിൽപ്പിന് അത്യന്താപേക്ഷിതമായി മാറിയിരിക്കുകയാണ്.
