ഇന്ത്യ-യുകെ വ്യാപാര കരാർ: ഷോകൾക്കായി കൊണ്ടുവരുന്ന മൃഗങ്ങൾക്ക് കസ്റ്റംസ് തീരുവ ഒഴിവാക്കി

ലണ്ടൻ : ഇന്ത്യ-യുകെ സമഗ്ര സാമ്പത്തിക-വ്യാപാര കരാറിന്റെ ഭാഗമായി, വിവിധ ഷോകൾക്കും മത്സരങ്ങൾക്കുമായി താൽക്കാലികമായി ഇന്ത്യയിലേക്ക് കൊണ്ടുവരുന്ന മൃഗങ്ങൾക്ക് കസ്റ്റംസ് തീരുവയും ഐജിഎസ്ടിയും ഒഴിവാക്കാൻ കേന്ദ്ര സർക്കാർ തീരുമാനിച്ചു. ജൂലൈ 15 മുതൽ ഈ പുതിയ ഇളവ് പ്രാബല്യത്തിൽ വരും. അന്താരാഷ്ട്ര തലത്തിലുള്ള എക്സിബിഷനുകൾ, പൊതുപരിപാടികൾ, പരിശീലനങ്ങൾ എന്നിവയ്ക്കായി ഇന്ത്യയിലെത്തിക്കുന്ന മൃഗങ്ങളെ പിന്നീട് തിരികെ കൊണ്ടുപോകുന്ന സാഹചര്യത്തിലാണ് ഈ ആനുകൂല്യം ലഭിക്കുക. ഗൈഡ് നായകൾ, പൊലീസ് സേനയുടെ ഭാഗമായ നായകൾ തുടങ്ങിയ സേവന മൃഗങ്ങൾക്കും ഈ ഇളവ് ബാധകമായിരിക്കും.

പുതിയ ആനുകൂല്യം ലഭിക്കുന്നതിനായി മൃഗങ്ങളെ ഇറക്കുമതി ചെയ്യുന്നവർ ആവശ്യമായ ഔദ്യോഗിക പ്രഖ്യാപനങ്ങളും ബോണ്ടുകളും കസ്റ്റംസ് അധികൃതർക്ക് മുന്നിൽ സമർപ്പിക്കേണ്ടതുണ്ട്. മൃഗങ്ങളെ സ്ഥിരമായി ഇന്ത്യയിൽ നിർത്താനല്ല, മറിച്ച് നിശ്ചിത പരിപാടികളിൽ പങ്കെടുപ്പിക്കാൻ മാത്രമാണ് കൊണ്ടുവരുന്നതെന്ന് ഉറപ്പാക്കാനാണ് ഈ കർശന നടപടി. അതേസമയം, സർക്കാർ വിഭാഗങ്ങൾക്കും നയതന്ത്ര സ്ഥാപനങ്ങൾക്കും പ്രത്യേക അനുമതിയുള്ള ചില ഗ്രൂപ്പുകൾക്കും ബാങ്ക് ഗ്യാരണ്ടി സമർപ്പിക്കുന്നതിൽ നിന്ന് ഇളവ് അനുവദിച്ചിട്ടുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്.

ഇന്ത്യയും യുകെയും തമ്മിലുള്ള വ്യാപാര, നിക്ഷേപ, സേവന ബന്ധങ്ങൾ കൂടുതൽ ദൃഢമാക്കാൻ ലക്ഷ്യമിട്ടുള്ള സിഇടിഎ കരാറിന്റെ ഭാഗമായാണ് ഈ നയമാറ്റം വിലയിരുത്തപ്പെടുന്നത്. അന്താരാഷ്ട്ര തലത്തിലുള്ള കായിക-വിനോദ പരിപാടികളിൽ പങ്കെടുക്കുന്ന സ്ഥാപനങ്ങൾക്കും വിവിധ സംഘങ്ങൾക്കും ഈ തീരുമാനം ആശ്വാസമാകും. തീരുവ ഇളവുകൾ പ്രഖ്യാപിച്ചിട്ടുണ്ടെങ്കിലും, മൃഗങ്ങളുടെ സുരക്ഷ, ആരോഗ്യപരിശോധന, തിരികെ കൊണ്ടുപോകൽ എന്നിവയുമായി ബന്ധപ്പെട്ട മാനദണ്ഡങ്ങൾ കർശനമായി പാലിക്കണമെന്നും അധികൃതർ വ്യക്തമാക്കിയിട്ടുണ്ട്.

English Summary: India has announced customs duty and IGST exemptions for animals temporarily imported for shows and public events under the India-UK CETA framework.