അപ്പോയിന്റ്മെന്റുകൾക്ക് മൂന്നാഴ്ച മുൻപ് അറിയിപ്പ്; എൻഎച്ച്എസിന്റെ പുതിയ പരിഷ്കാരം

ലണ്ടൻ : രോഗികൾക്ക് അപ്പോയിന്റ്മെന്റ് തീയതി കഴിഞ്ഞതിന് ശേഷം ആശുപത്രിയിൽ നിന്നുള്ള കത്തുകൾ ലഭിക്കുന്ന ദുരവസ്ഥയ്ക്ക് വിരാമമിടാൻ ബ്രിട്ടനിലെ നാഷണൽ ഹെൽത്ത് സർവീസ് പുതിയ നടപടികൾ പ്രഖ്യാപിച്ചു. പുതിയ പ്ലാൻ പ്രകാരം, മുൻകൂട്ടി നിശ്ചയിക്കുന്ന എല്ലാ പുതിയ ചികിത്സാ അപ്പോയിന്റ്മെന്റുകൾക്കും രോഗികൾക്ക് കുറഞ്ഞത് മൂന്ന് ആഴ്ച മുൻപെങ്കിലും ഔദ്യോഗിക അറിയിപ്പ് നൽകും. എൻഎച്ച്എസിൽ നിന്നുള്ള ആശയവിനിമയത്തിലെ പോരായ്മകൾ പല കുടുംബങ്ങൾക്കും വലിയ ബുദ്ധിമുട്ടായിരുന്നുവെന്ന് എൻഎച്ച്എസ് ചീഫ് എക്സിക്യൂട്ടീവ് സർ ജിം മാക്കി സമ്മതിച്ചു. ഇനി മുതൽ രോഗിയെ ആശുപത്രി സ്പെഷ്യലിസ്റ്റിന് റഫർ ചെയ്തതും വെയിറ്റിംഗ് ലിസ്റ്റിൽ ഉൾപ്പെടുത്തിയതും എൻഎച്ച്എസ് ആപ്പ് വഴി രോഗിക്ക് സ്ഥിരീകരണ സന്ദേശമായി ലഭിക്കും.

ഓൺലൈൻ ഷോപ്പിംഗ് ട്രാക്ക് ചെയ്യുന്നത് പോലെ രോഗികൾക്ക് അവരുടെ റഫറലിന്റെ പുരോഗതിയും നിലവിലെ അവസ്ഥയും ഇനി മുതൽ എളുപ്പത്തിൽ പിന്തുടരാനാകും. ഡിജിറ്റൽ സംവിധാനങ്ങൾക്കൊപ്പം ടെക്സ്റ്റ് സന്ദേശം, കത്ത്, ഫോൺ കോൾ തുടങ്ങിയ പരമ്പരാഗത ആശയവിനിമയ മാർഗങ്ങളും നിലവിലുണ്ടാകും. വെയിറ്റിംഗ് ലിസ്റ്റിൽ തുടരുന്ന രോഗികൾക്ക് കുറഞ്ഞത് 12 ആഴ്ചയിൽ ഒരിക്കലെങ്കിലും അവരുടെ ആരോഗ്യനിലയിലും ആവശ്യങ്ങളിലും മാറ്റമുണ്ടോ എന്ന് ചോദിച്ച് അപ്ഡേറ്റുകൾ നൽകും. കൂടാതെ കാത്തിരിപ്പ് കാലാവധിയിൽ സ്വയംപരിചരണം എങ്ങനെ നടത്തണമെന്നും, ആരോഗ്യനില വഷളായാൽ എന്ത് ചെയ്യണമെന്നും സംബന്ധിച്ച നിർദേശങ്ങളും രോഗികൾക്ക് ലഭ്യമാക്കും.

അവസാന നിമിഷം അപ്പോയിന്റ്മെന്റ് മാറ്റിവെക്കേണ്ടി വരുന്ന രോഗികൾക്ക് 28 ദിവസത്തിനുള്ളിൽ പുതിയ തീയതി നൽകുന്നുവെന്ന് ആശുപത്രികൾ ഉറപ്പാക്കേണ്ടതുണ്ട്. ചികിത്സ പൂർത്തിയായ ശേഷം അടുത്ത ഘട്ടങ്ങൾ എന്താണെന്നും ഫോളോ-അപ്പ് അപ്പോയിന്റ്മെന്റ് ആവശ്യമുണ്ടോ എന്നും വ്യക്തമാക്കും. രോഗികളുടെ അനുഭവം മെച്ചപ്പെടുത്തുന്നതിനായി എൻഎച്ച്എസ് ആദ്യമായി ഒരു ദേശീയ പേഷ്യന്റ് എക്സ്പീരിയൻസ് ഡയറക്ടറെ നിയമിക്കും. പുതിയ എട്ട് കർശന മാനദണ്ഡങ്ങൾ രാജ്യത്തെ എല്ലാ എൻഎച്ച്എസ് ട്രസ്റ്റുകൾക്കും ബാധകമാക്കുമെന്നും ഇവ പാലിക്കുന്നതിലെ പുരോഗതി വർഷംതോറും പ്രസിദ്ധീകരിക്കുമെന്നും അധികൃതർ അറിയിച്ചു.

English Summary: The NHS will give patients at least three weeks’ notice for planned appointments and improve communication through clearer updates.