ഗ്ലാസ്‌ഗോയിൽ വാരാന്ത്യ പ്രതിഷേധങ്ങൾ; അക്രമമുണ്ടായാൽ ശക്തമായ നടപടി സ്വീകരിക്കുമെന്ന് പൊലീസ്

ലണ്ടൻ : ഗ്ലാസ്‌ഗോയിൽ ശനിയാഴ്ച നടക്കാനിരിക്കുന്ന പരസ്പരവിരുദ്ധ പ്രതിഷേധങ്ങൾക്കിടെ അക്രമമോ ക്രമസമാധാന ലംഘനമോ ഉണ്ടായാൽ ശക്തമായ നടപടി സ്വീകരിക്കുമെന്ന് പൊലീസ് മുന്നറിയിപ്പ് നൽകി. ഗ്ലാസ്‌ഗോ ഗ്രീനിൽ ഉച്ചയ്ക്ക് ഒന്നിന് ‘പിങ്ക് ലേഡീസ്’ പ്രതിഷേധം നടക്കാനിരിക്കെ, കുടിയേറ്റവിരുദ്ധ സംഘടനകളും ഇതിന് പിന്തുണയുമായി രംഗത്തെത്തിയിട്ടുണ്ട്. ഇതിനെതിരെ ‘Stand Up to Racism Scotland’ ഉൾപ്പെടെയുള്ള സംഘടനകൾ ഉച്ചയ്ക്ക് 12ന് പ്രതിപ്രതിഷേധവും സംഘടിപ്പിക്കും. 

ജൂലൈ 25ന് ഗ്ലാസ്‌ഗോ ഗ്രീനിൽ നടന്ന കുടിയേറ്റവിരുദ്ധ റാലിക്കിടെ പ്രതിപ്രതിഷേധക്കാരുമായി സംഘർഷമുണ്ടായിരുന്നു. സംഭവവുമായി ബന്ധപ്പെട്ട് ഇതുവരെ 20ലേറെ പേരെതിരെ കേസെടുത്തിട്ടുണ്ട്. പുതിയ പ്രതിഷേധങ്ങൾ കണക്കിലെടുത്ത് ഇത്തവണ സുരക്ഷ ശക്തമാക്കാനാണ് പൊലീസ് തീരുമാനം. 

പ്രതിഷേധ മേഖലയിൽ യൂണിഫോം ധരിച്ച ഉദ്യോഗസ്ഥർക്കൊപ്പം പൊലീസ് കുതിരകൾ, നായ്ക്കൾ, ഡ്രോണുകൾ, ഹെലികോപ്റ്റർ എന്നിവയും വിന്യസിക്കും. വിദ്വേഷ കുറ്റകൃത്യങ്ങൾ വിലയിരുത്താൻ പ്രത്യേക പരിശീലനം നേടിയ ഉദ്യോഗസ്ഥരും സ്ഥലത്തുണ്ടാകും. സമാധാനപരമായി പ്രതിഷേധിക്കാനുള്ള അവകാശം എല്ലാവർക്കുമുണ്ടെന്നും എന്നാൽ പ്രതിഷേധത്തിന്റെ മറവിൽ അക്രമമോ ക്രമക്കേടോ സൃഷ്ടിക്കാൻ ശ്രമിക്കുന്നവരോട് യാതൊരു വിട്ടുവീഴ്ചയും ഉണ്ടാകില്ലെന്നും പൊലീസ് വ്യക്തമാക്കി.