ഐഎൽആർ നിയമപരിഷ്കാരം: പ്രവാസികളുടെ ആശങ്കയുമായി കലാ കേരള; മാൻസ്ഫീൽഡ് എംപിയുമായി ചർച്ച നടത്തി
ലണ്ടൻ : യു കെയിലെ കുടിയേറ്റ സമൂഹത്തിന്റെ ഭാവി അനിശ്ചിതത്വത്തിലാക്കുന്ന പുതിയ ഐഎൽആർ (ILR) നിയമപരിഷ്കാരങ്ങളിൽ ആശങ്ക അറിയിച്ച് മാൻസ്ഫീൽഡ് & ആഷ്ഫീൽഡ് കലാ കേരള ആർട്സ് ആൻഡ് സ്പോർട്സ് ക്ലബ് അധികൃതർക്ക് നിവേദനം നൽകി. നിയമം പുനഃപരിശോധിക്കണമെന്ന് ആവശ്യപ്പെട്ട് ക്ലബ്ബിന്റെ നേതൃത്വത്തിൽ നടത്തിയ വിപുലമായ ഒപ്പുശേഖരണത്തിന് ശേഷമാണ് പ്രാദേശിക എംപി സ്റ്റീവ് എംന് പരാതി സമർപ്പിച്ചത്. പ്രവാസികളെ നേരിട്ട് ബാധിക്കുന്ന ഈ വിഷയത്തിൽ അടിയന്തരമായ രാഷ്ട്രീയ ഇടപെടൽ വേണമെന്നതായിരുന്നു നിവേദനത്തിലെ പ്രധാന ആവശ്യം.
കലാ കേരളയുടെ ക്ഷണപ്രകാരം മാൻസ്ഫീൽഡിൽ എത്തിയ എംപിയുമായി ഭാരവാഹികളും പ്രവാസി സമൂഹവും വിശദമായ ചർച്ചകൾ നടത്തി. പുതിയ നിയമം മൂലം കുടിയേറ്റ കുടുംബങ്ങൾ നേരിടുന്ന സാമ്പത്തികവും സാമൂഹികവുമായ ബുദ്ധിമുട്ടുകൾ എംപിയെ നേരിട്ട് ബോധ്യപ്പെടുത്തി. നിവേദനത്തിലെ ഓരോ കാര്യവും ഗൗരവമായി ശ്രദ്ധിച്ച സ്റ്റീവ് എം, പ്രവാസി സമൂഹത്തിന്റെ ആശങ്കകൾ എത്രയും വേഗം ഹോം സെക്രട്ടറിയുടെ ശ്രദ്ധയിൽപ്പെടുത്തുമെന്ന് ഉറപ്പുനൽകി.
ഈ വിഷയം ബ്രിട്ടീഷ് പാർലമെന്റിൽ ഉന്നയിക്കുമെന്നും ഹോം സെക്രട്ടറിക്ക് നേരിട്ട് നിവേദനം കൈമാറുമെന്നും എംപി അറിയിച്ചത് കുടിയേറ്റക്കാർക്ക് വലിയ ആശ്വാസമായിട്ടുണ്ട്. പ്രവാസി സമൂഹത്തിന്റെ അവകാശങ്ങൾ സംരക്ഷിക്കുന്നതിനായി ആവശ്യമായ എല്ലാ പിന്തുണയും അദ്ദേഹം വാഗ്ദാനം ചെയ്തു. പരിപാടിയിൽ പങ്കെടുത്തവർക്കും ഒപ്പുശേഖരണത്തിൽ സഹകരിച്ചവർക്കും കലാ കേരള ഭാരവാഹികൾ നന്ദി രേഖപ്പെടുത്തി.
English Summary:
Kala Kerala Arts and Sports Club met with MP Steve M to submit a petition regarding ILR concerns, and the MP assured to take up the matter with the Home Secretary.
