ഇംഗ്ലീഷ് ചാനൽ വഴി എത്തിയ കുടിയേറ്റക്കാരെ കെന്റിലേക്ക് മാറ്റി; ഹാംഷെയറിൽ കനത്ത പ്രതിഷേധം, ആറുപേർ അറസ്റ്റിൽ
A group of 149 migrants who arrived in Hampshire via the English Channel have been moved to Kent for processing amid local protests that resulted in six arrests.
ലണ്ടൻ : ഇംഗ്ലീഷ് ചാനൽ കടന്ന് ഹാംഷെയറിലെ ഗോസ്‌പോർട്ടിൽ എത്തിയ കുടിയേറ്റക്കാരെ തുടർനടപടികൾക്കായി കെന്റിലെ താത്കാലിക കേന്ദ്രങ്ങളിലേക്ക് മാറ്റുമെന്ന് യുകെ ആഭ്യന്തര മന്ത്രാലയം അറിയിച്ചു. ആർ‌എൻ‌എൽ‌ഐ ബോട്ടുകളിൽ ഞായറാഴ്ച രാത്രിയോടെ ഹാംഷെയർ തീരത്തെത്തിച്ച 149 കുടിയേറ്റക്കാരെ നാല് കോച്ചുകളിലായാണ് കെന്റിലേക്ക് കൊണ്ടുപോയത്. ഇവിടെ ഇവർ കർശനമായ ആരോഗ്യ, സുരക്ഷാ, ബയോമെട്രിക് പരിശോധനകൾക്ക് വിധേയരാകുമെന്ന് അധികൃതർ വ്യക്തമാക്കി.
കുടിയേറ്റക്കാരെ ഹാംഷെയറിലേക്ക് കൊണ്ടുവരുന്നതിനെതിരെ പ്രദേശത്ത് വ്യാപകമായ പ്രതിഷേധം അരങ്ങേറി. ഹാസ്‌ലർ മറീനയ്ക്ക് സമീപം തടിച്ചുകൂടിയ പ്രതിഷേധക്കാരെ നിയന്ത്രിക്കാൻ പോലീസ് പബ്ലിക് ഓർഡർ ആക്ട് പ്രകാരം പ്രത്യേക നിയന്ത്രണങ്ങളും മുഖം മൂടുന്നതിനുള്ള നിരോധനവും ഏർപ്പെടുത്തിയിരുന്നു. പ്രതിഷേധത്തിനിടെയുണ്ടായ അനിഷ്ട സംഭവങ്ങളെത്തുടർന്ന് ആറുപേരെ പോലീസ് അറസ്റ്റ് ചെയ്തു.
സാധാരണയായി തെക്കുകിഴക്കൻ തീരങ്ങളിലാണ് ചെറിയ ബോട്ടുകൾ എത്താറുള്ളതെങ്കിലും, പടിഞ്ഞാറൻ ഭാഗമായ ഗോസ്‌പോർട്ട് മേഖലയിലേക്ക് കഴിഞ്ഞ ഒരു മാസത്തിനിടെ നടക്കുന്ന മൂന്നാമത്തെ കുടിയേറ്റമാണിത്. ഈ വർഷം ഇതുവരെ ഇംഗ്ലീഷ് ചാനൽ വഴി 19,451 പേരാണ് യുകെയിലെത്തിയത്. മുൻ വർഷങ്ങളെ അപേക്ഷിച്ച് ചാനൽ വഴിയുള്ള അനധികൃത കുടിയേറ്റക്കാരുടെ എണ്ണത്തിൽ കാര്യമായ കുറവുണ്ടായിട്ടുണ്ടെന്ന് ഔദ്യോഗിക കണക്കുകൾ വ്യക്തമാക്കുന്നു.
