യുവാക്കളിൽ കാൻസർ ബാധ ക്രമാതീതമായി കൂടുന്നു: ഞെട്ടിക്കുന്ന കണ്ടെത്തലുമായി അന്താരാഷ്ട്ര പഠനം
A major international study by the World Cancer Research Fund reveals that cancer rates, particularly prostate, bowel, and kidney cancers, are rising rapidly among adults under 50 due to lifestyle factors, obesity, and poor diet.
ലണ്ടൻ : അൻപത് വയസ്സിന് താഴെയുള്ള ചെറുപ്പക്കാരിൽ വിവിധ തരത്തിലുള്ള കാൻസർ രോഗബാധ അതിവേഗം വർധിച്ചുവരുന്നതായി അന്താരാഷ്ട്ര പഠനം. യുകെ, യുഎസ്, നെതർലൻഡ്‌സ് എന്നിവിടങ്ങളിലെ ആരോഗ്യ വിവരങ്ങൾ പരിശോധിച്ച് വേൾഡ് കാൻസർ റിസർച്ച് ഫണ്ട് (WCRF) നടത്തിയ പഠനത്തിലാണ് ആശങ്കയുണർത്തുന്ന ഈ വിവരങ്ങൾ പുറത്തുവന്നത്. ഇംഗ്ലണ്ടിൽ ഏഴ് ഇനം കാൻസറുകളിലും, യുഎസിൽ അഞ്ചും നെതർലൻഡ്‌സിൽ നാലും കാൻസർ തരങ്ങളിലാണ് ചെറുപ്പക്കാർക്കിടയിൽ ഇത്തരത്തിൽ കുത്തനെ വർധന രേഖപ്പെടുത്തിയിട്ടുള്ളത്.
ഇംഗ്ലണ്ടിൽ 2001-നെ അപേക്ഷിച്ച് അൻപത് വയസ്സിന് താഴെയുള്ള പുരുഷന്മാരിലെ പ്രോസ്റ്റേറ്റ് കാൻസർ നിരക്ക് നാലിരട്ടിയായി ഉയർന്നു. കൂടാതെ കുടൽ, വൃക്ക, ഗർഭാശയ കാൻസർ കേസുകൾ ഇരട്ടിയിലധികമായി. സ്തനാർബുദം, പാൻക്രിയാസ്, കരൾ എന്നിവയെ ബാധിക്കുന്ന അർബുദങ്ങളിലും വർധനവുണ്ട്. അതേസമയം, പുകവലി കുറഞ്ഞതിന്റെ ഫലമായി മൂന്ന് രാജ്യങ്ങളിലും ഈ പ്രായക്കാരിലെ ശ്വാസകോശ കാൻസർ നിരക്കിൽ കുറവുണ്ടായിട്ടുണ്ട്.
അനാരോഗ്യകരമായ ജീവിതശൈലി, അമിതവണ്ണം, വ്യായാമക്കുറവ്, പോഷകഗുണമില്ലാത്ത ഭക്ഷണം, മദ്യപാനം എന്നിവയാണ് യുവാക്കളിലെ ഈ വർധനവിന് പ്രധാന കാരണങ്ങളായി വിദഗ്ധർ ചൂണ്ടിക്കാണിക്കുന്നത്. രോഗലക്ഷണങ്ങളെക്കുറിച്ചുള്ള ബോധവൽക്കരണവും നേരത്തെയുള്ള രോഗനിർണയവും കേസുകൾ കൂടുതൽ കണ്ടെത്താൻ സഹായിക്കുന്നുണ്ടെങ്കിലും, ജീവിതശൈലീ മാറ്റങ്ങൾ പ്രതിവർഷം ആയിരക്കണക്കിന് ജീവനുകൾ നഷ്ടപ്പെടുത്തുന്ന ഗുരുതര സാഹചര്യമാണെന്ന് ഗവേഷകർ മുന്നറിയിപ്പ് നൽകുന്നു.
