ഒളിക്യാമറയിൽ കുടുങ്ങി വംശീയ അധിക്ഷേപം; ബ്രിട്ടനിലെ 'റിഫോം യുകെ' പാർട്ടിയിൽ വൻ പ്രതിസന്ധി, മൂന്ന് പേർ രാജിവെച്ചു

ലണ്ടൻ : ബ്രിട്ടനിലെ 'റിഫോം യുകെ' (Reform UK) പാർട്ടിയിലെ ജനപ്രതിനിധികളും സ്ഥാനാർത്ഥികളും വംശീയവും സ്ത്രീവിരുദ്ധവുമായ പരാമർശങ്ങൾ നടത്തുന്ന ദൃശ്യങ്ങൾ പുറത്തുവന്നതോടെ പാർട്ടി കടുത്ത പ്രതിസന്ധിയിലായി. ഐടിവി (ITV) നടത്തിയ രഹസ്യ അന്വേഷണത്തിലാണ് നേതാക്കളുടെ അങ്ങേയറ്റം വിദ്വേഷം നിറഞ്ഞ സംഭാഷണങ്ങൾ പുറത്തായത്. സംഭവത്തെത്തുടർന്ന് പാർട്ടിയിലെ മൂന്ന് കൗൺസിലർമാർ ഇതിനകം രാജിവെച്ചു. കൂടുതൽ നേതാക്കളുടെ ദൃശ്യങ്ങൾ വരുംദിവസങ്ങളിൽ പുറത്തുവരുമെന്ന ആശങ്കയിൽ പാർട്ടി നേതാവ് നൈജൽ ഫരാജ് നടത്താനിരുന്ന സുപ്രധാന പ്രഖ്യാപനങ്ങൾ മാറ്റിവെച്ചിരിക്കുകയാണ്.

ഏഷ്യൻ വംശജരായ വീട്ടുടമകളെ 'പരാദങ്ങൾ' എന്ന് വിളിക്കുകയും, ബ്രിട്ടനിലെ ജനസംഖ്യയിൽ വെള്ളക്കാരല്ലാത്തവർ ഒരു ശതമാനത്തിൽ കൂടാൻ പാടില്ലെന്ന് പറയുകയും ചെയ്യുന്ന ഡെപ്യൂട്ടി മേയർ കൂടിയായ അലൻ ഫീനിയുടെ ദൃശ്യങ്ങളാണ് പുറത്തുവന്നവയിൽ പ്രധാനം. ഇതിനുപുറമെ, ചാൾസ് രാജാവിനെ വധിക്കണമെന്ന് ആഹ്വാനം ചെയ്യുന്ന മറ്റൊരു കൗൺസിലറുടെയും, സഹപ്രവർത്തകരായ സ്ത്രീകൾക്കെതിരെ മോശം ലൈംഗിക പരാമർശങ്ങൾ നടത്തുന്ന മറ്റ് ചിലരുടെയും ദൃശ്യങ്ങളും ഇതിൽ ഉൾപ്പെടുന്നു. വിവാദങ്ങൾക്ക് പിന്നാലെ അലൻ ഫീനിയും ക്രിസ് വീലനും വ്യക്തിപരവും ആരോഗ്യപരവുമായ കാരണങ്ങൾ ചൂണ്ടിക്കാട്ടി സ്ഥാനമൊഴിയുകയായിരുന്നു.

അതേസമയം, വ്യാജ തിരിച്ചറിയൽ രേഖകൾ ഉപയോഗിച്ച് തങ്ങളുടെ ഓഫീസിലേക്ക് നുഴഞ്ഞുകയറി ഐടിവി ചതിപ്രയോഗം നടത്തുകയാണെന്നാണ് റിഫോം യുകെയുടെ വിശദീകരണം. എന്നാൽ നേതാക്കളുടെ ഈ വെറുപ്പുളവാക്കുന്ന വംശീയത അംഗീകരിക്കാനാകില്ലെന്നും, ഇത്തരം പരാമർശങ്ങൾ നടത്തിയ മുഴുവൻ പേരെയും പാർട്ടിയിൽ നിന്ന് ഉടനടി പുറത്താക്കണമെന്നും ലേബർ പാർട്ടി അധ്യക്ഷ ബ്രിഡ്ജറ്റ് ഫിലിപ്‌സൺ ആവശ്യപ്പെട്ടു. വരും ദിവസങ്ങളിൽ പാർട്ടി ആസ്ഥാനത്തുനിന്നുള്ള കൂടുതൽ ഒളിക്യാമറ ദൃശ്യങ്ങൾ പുറത്തുവരുന്നത് റിഫോം യുകെയ്ക്ക് വലിയ രാഷ്ട്രീയ തിരിച്ചടിയാകുമെന്നാണ് വിലയിരുത്തൽ.