സ്റ്റീഫൻ ലോറൻസിന്റെ കൊലയാളി ഗാരി ഡോബ്സൺ മോചനത്തിനായി ആദ്യമായി പരോൾ അപേക്ഷ നൽകി

ലണ്ടൻ : 1993ൽ വംശീയ ആക്രമണത്തിൽ കൊല്ലപ്പെട്ട 18കാരനായ സ്റ്റീഫൻ ലോറൻസിന്റെ കൊലയാളികളിലൊരാളായ ഗാരി ഡോബ്സൺ മോചനത്തിനായി ആദ്യമായി പരോൾ അപേക്ഷ നൽകി. 2012ൽ ജീവപര്യന്തം തടവിന് ശിക്ഷിക്കപ്പെട്ട ഡോബ്സൺ, 51, ഇപ്പോഴാണ് പരോൾ പരിഗണനയ്ക്കായി അപേക്ഷ സമർപ്പിച്ചിരിക്കുന്നത്. ജയിലിൽനിന്ന് മോചനം നേടുന്നതിനായി കൊലപാതകം നടന്ന സ്ഥലത്ത് താൻ ഉണ്ടായിരുന്നുവെന്ന കാര്യം അംഗീകരിക്കേണ്ടിവരുമെന്ന വിലയിരുത്തലും ഉയർന്നിട്ടുണ്ട്. 

1993 ഏപ്രിൽ 22ന് തെക്കുകിഴക്കൻ ലണ്ടനിലെ എൽതാമിൽ ബസ് സ്റ്റോപ്പിന് സമീപമാണ് സ്റ്റീഫൻ ലോറൻസിനെ ഒരു സംഘം വെള്ളക്കാരായ യുവാക്കൾ ആക്രമിച്ച് കൊലപ്പെടുത്തിയത്. വർഷങ്ങൾക്കുശേഷം ലഭിച്ച നിർണായക ശാസ്ത്രീയ തെളിവുകളുടെ അടിസ്ഥാനത്തിലാണ് ഡോബ്സണും ഡേവിഡ് നോറിസും 2012ൽ കുറ്റക്കാരെന്ന് കണ്ടെത്തിയത്. ഡോബ്സന്റെ ജാക്കറ്റിൽ കണ്ടെത്തിയ സ്റ്റീഫന്റെ രക്തക്കറ ഉൾപ്പെടെയുള്ള ഫോറൻസിക് തെളിവുകൾ കേസിൽ നിർണായകമായി. 

കേസിലെ മറ്റൊരു പ്രതിയായ ഡേവിഡ് നോറിസ് കഴിഞ്ഞ വർഷം പരോൾ ലഭിക്കുന്നതിനായി തന്റെ പങ്ക് അംഗീകരിച്ചെങ്കിലും, കൊലപാതകത്തിൽ പങ്കെടുത്ത മറ്റുള്ളവരുടെ പേരുകൾ വെളിപ്പെടുത്താൻ തയ്യാറായിരുന്നില്ല. തുടർന്ന് അദ്ദേഹത്തിന് പരോൾ നിഷേധിച്ചിരുന്നു. ഡോബ്സന്റെ നിലവിലെ മാനസികാവസ്ഥ, ജയിലിലെ പെരുമാറ്റവും പുനരധിവാസ പുരോഗതിയും ഉൾപ്പെടെയുള്ള കാര്യങ്ങൾ പരോൾ അധികൃതർ വിശദമായി പരിശോധിക്കും.