ഹന്താവൈറസ് ഭീതിയിലായ ക്രൂയിസ് കപ്പലിൽ നിന്നും യാത്രക്കാരെ ഒഴിപ്പിച്ചുതുടങ്ങി: മൂന്ന് മരണം, ബ്രിട്ടീഷ് പൗരൻ ഐസൊലേഷനിൽ

ലണ്ടൻ : വിനോദസഞ്ചാര കപ്പലായ എംവി ഹോണ്ടിയസിൽ ഹന്താവൈറസ് ബാധ സ്ഥിരീകരിച്ചതിനെത്തുടർന്ന് യാത്രക്കാരെ ഒഴിപ്പിച്ചു തുടങ്ങി. രോഗം ബാധിച്ച മൂന്ന് പേർ ഇതിനോടകം മരണപ്പെട്ടതായാണ് റിപ്പോർട്ടുകൾ. വൈറസ് ബാധ സ്ഥിരീകരിച്ച ബ്രിട്ടീഷ് പൗരനും മുൻ പോലീസ് ഉദ്യോഗസ്ഥനുമായ മാർട്ടിൻ ആംസ്റ്റീ ഉൾപ്പെടെ മൂന്ന് പേരെ കപ്പലിൽ നിന്നും നെതർലൻഡ്‌സിലെ ആശുപത്രിയിലേക്ക് മാറ്റി. താൻ നിലവിൽ പ്രത്യേക നിരീക്ഷണത്തിലാണെന്നും ആരോഗ്യനില തൃപ്തികരമാണെന്നും അദ്ദേഹം വ്യക്തമാക്കി.
അഞ്ച് പേർക്കാണ് നിലവിൽ വൈറസ് ബാധ സ്ഥിരീകരിച്ചിട്ടുള്ളതെന്ന് ലോകാരോഗ്യ സംഘടന അറിയിച്ചു. കപ്പലിലുണ്ടായിരുന്ന രണ്ട് ബ്രിട്ടീഷുകാർ സ്വന്തം നിലയിൽ നാട്ടിലേക്ക് മടങ്ങിയെങ്കിലും ഇവർ നിലവിൽ നിരീക്ഷണത്തിലാണ്. എലികളിലൂടെയും മറ്റ് കരണ്ടുതീനികളിലൂടെയും പകരുന്ന ഈ വൈറസ് മനുഷ്യരിൽ ശ്വാസകോശ സംബന്ധമായ ഗുരുതര പ്രശ്നങ്ങൾക്ക് കാരണമാകും. അർജന്റീനയിലെ ഉഷുവായയിൽ പക്ഷിനിരീക്ഷണത്തിന് പോയ ദമ്പതികളിൽ നിന്നാകാം വൈറസ് കപ്പലിലേക്ക് പടർന്നതെന്നാണ് പ്രാഥമിക നിഗമനം.

നിലവിൽ കേപ്പ് വെർഡെയിൽ നിന്നും കാനറി ദ്വീപുകളിലേക്ക് യാത്ര ചെയ്യുന്ന കപ്പലിൽ 140 ഓളം പേരുണ്ട്. കപ്പൽ ലക്ഷ്യസ്ഥാനത്ത് എത്തിയ ശേഷം ബാക്കിയുള്ള യാത്രക്കാരെയും ജീവനക്കാരെയും സുരക്ഷിതമായി പുറത്തെത്തിക്കാനാണ് അധികൃതരുടെ തീരുമാനം. എട്ട് ആഴ്ച വരെ നിരീക്ഷണം ആവശ്യമായി വന്നേക്കാം എങ്കിലും പൊതുജനങ്ങൾക്ക് നിലവിൽ വലിയ ഭീഷണിയില്ലെന്ന് ആരോഗ്യ ഏജൻസികൾ അറിയിച്ചു. ഇത് കോവിഡ് പോലെ ഒരു മഹാമാരിയാകാൻ സാധ്യതയില്ലെന്ന് ലോകാരോഗ്യ സംഘടനയിലെ വിദഗ്ധർ വ്യക്തമാക്കിയിട്ടുണ്ട്.