നെറ്റ് സീറോ ലക്ഷ്യങ്ങൾക്കിടയിലും വിമാനയാത്രയ്ക്കായി ലക്ഷങ്ങൾ ചെലവിട്ട് ബ്രിട്ടീഷ് ആരോഗ്യവകുപ്പ്

ലണ്ടൻ : നെറ്റ് സീറോ ലക്ഷ്യങ്ങൾ കൈവരിക്കുന്നതിനായി ആഭ്യന്തര വിമാനയാത്രകൾക്ക് നിരോധനം ഏർപ്പെടുത്തിയിട്ടും ബ്രിട്ടനിലെ നാഷണൽ ഹെൽത്ത് സർവീസ് (NHS) ഉദ്യോഗസ്ഥർ വിമാനയാത്രകൾക്കായി വൻതുക ചെലവഴിക്കുന്നതായി റിപ്പോർട്ടുകൾ. 2025 ലും 2026 ലുമായി ഏകദേശം 13,000 പൗണ്ട് ചെലവഴിച്ച് തൊണ്ണൂറിലധികം വിമാനയാത്രകളാണ് എൻഎച്ച്എസ് ഉദ്യോഗസ്ഥർ നടത്തിയത്. പരിസ്ഥിതി സൗഹൃദ നടപടികളുടെ ഭാഗമായി 2024 മുതൽ ആഭ്യന്തര യാത്രകൾക്ക് സ്വയം ഏർപ്പെടുത്തിയ നിരോധനം നിലനിൽക്കെയാണ് അധികൃതരുടെ ഈ നടപടി. വിവരാവകാശ നിയമപ്രകാരം പുറത്തുവന്ന കണക്കുകൾ നികുതിദായകരുടെ പണം ദുരുപയോഗം ചെയ്യുന്നതിനെച്ചൊല്ലിയുള്ള വലിയ പ്രതിഷേധങ്ങൾക്ക് വഴിതെളിച്ചിരിക്കുകയാണ്.

വിമാനയാത്രകൾ നിയന്ത്രിക്കുന്നതിനായി ഒരു പ്രത്യേക പാനൽ രൂപീകരിച്ചിട്ടുണ്ടെങ്കിലും, പലപ്പോഴും ഈ നിയന്ത്രണങ്ങൾ കാറ്റിൽപ്പറത്തുകയാണ് ചെയ്യുന്നത്. കഴിഞ്ഞ വർഷം ലണ്ടൻ - ബെൽഫാസ്റ്റ്, ലിവർപൂൾ - ഐൽ ഓഫ് മാൻ തുടങ്ങിയ റൂട്ടുകളിലാണ് കൂടുതൽ യാത്രകൾ നടന്നത്. ട്രെയിൻ അല്ലെങ്കിൽ ബസ് മാർഗമുള്ള യാത്രകൾക്ക് കൂടുതൽ സമയം ആവശ്യമാണെന്നതും ചില സാഹചര്യങ്ങളിൽ വിമാനയാത്രയെക്കാൾ കൂടുതൽ ചെലവ് വരുന്നുണ്ടെന്നതുമാണ് അധികൃതർ ഇതിന് നൽകുന്ന വിശദീകരണം. എന്നാൽ 2024 ൽ മാത്രം ഏകദേശം 30,000 പൗണ്ട് ചെലവിട്ട് 148 യാത്രകൾ നടത്തിയത് നിരോധനത്തിന്റെ പ്രസക്തിയെ ചോദ്യം ചെയ്യുന്നു.

യാത്രകളിൽ 88 ശതമാനം കുറവ് വരുത്തിയെന്ന് എൻഎച്ച്എസ് അവകാശപ്പെടുമ്പോഴും, നിയമങ്ങൾ ലംഘിക്കപ്പെടുന്നത് അംഗീകരിക്കാനാവില്ലെന്ന് നികുതിദായകരുടെ സംഘടനകൾ വ്യക്തമാക്കി. പ്രത്യേക അനുമതിയുള്ള അടിയന്തര സാഹചര്യങ്ങളിൽ മാത്രമേ വിമാനയാത്ര അനുവദിക്കൂ എന്നാണ് ചട്ടമെങ്കിലും, ബിസിനസ് ക്ലാസ് ഉൾപ്പെടെയുള്ള യാത്രകൾ നടന്നതായും റിപ്പോർട്ടിൽ പറയുന്നു. സർക്കാർ സ്ഥാപനങ്ങൾ തന്നെ നിയമങ്ങൾ ലംഘിക്കുന്നത് തെറ്റായ കീഴ്‌വഴക്കമുണ്ടാക്കുമെന്നും പരിസ്ഥിതി സംരക്ഷണ പ്രവർത്തനങ്ങളെ ഇത് പിന്നോട്ടടിക്കുമെന്നും വിമർശകർ ചൂണ്ടിക്കാട്ടുന്നു.

Despite a self-imposed net zero ban, NHS England has faced criticism for spending thousands of pounds on over 90 domestic flights.