ബ്രസൽസ് വിമാനത്താവളത്തിൽ വൻ പ്രതിസന്ധി: 140 വിമാന സർവീസുകൾ റദ്ദാക്കുന്നു; യുകെ സർവീസുകളെയും ബാധിക്കും
Around 140 flights at Brussels Airport are set to be cancelled on Friday due to a strike by ground handling staff, directly impacting services to and from the UK.
ലണ്ടൻ : ദേശീയ പണിമുടക്കിനെ തുടർന്ന് ബെൽജിയത്തിലെ ബ്രസൽസ് വിമാനത്താവളത്തിൽ നിന്നുള്ള 140 ഓളം വിമാന സർവീസുകൾ വെള്ളിയാഴ്ച റദ്ദാക്കാൻ തീരുമാനിച്ചു. എയർപോർട്ടിൽ ഗ്രൗണ്ട് ഹാൻഡ്‌ലിങ് സേവനങ്ങൾ നൽകുന്ന അലിസിയ (Alyzia) കമ്പനിയിലെ ജീവനക്കാർ സമരത്തിൽ പങ്കെടുക്കുന്നതാണ് വൻ പ്രതിസന്ധിക്ക് കാരണമായത്. യാത്രക്കാർ പുറപ്പെടുന്നതിന് മുൻപ് സർവീസ് വിവരങ്ങൾ പരിശോധിക്കണമെന്ന് എയർപോർട്ട് അധികൃതർ മുന്നറിയിപ്പ് നൽകിയിട്ടുണ്ട്.
ജീവനക്കാരുടെ പണിമുടക്ക് കാരണം അലിസിയ കൈകാര്യം ചെയ്യുന്ന പകുതിയോളം സർവീസുകൾ മാത്രമേ വെള്ളിയാഴ്ച സാധാരണ നിലയിൽ പ്രവർത്തിക്കൂ എന്ന് വിമാനത്താവള അധികൃതർ ഔദ്യോഗിക കുറിപ്പിലൂടെ വ്യക്തമാക്കി. ബാക്കി വരുന്ന വിമാനങ്ങൾ പൂർണമായും റദ്ദാക്കാൻ നിർബന്ധിതരാകുമെന്നും യാത്രക്കാർക്കുണ്ടായ ബുദ്ധിമുട്ടിൽ ഖേദിക്കുന്നുവെന്നും അവർ അറിയിച്ചു.
ലണ്ടനിലേക്കും മാഞ്ചസ്റ്ററിലേക്കുമുള്ള പ്രധാന വിമാന സർവീസുകളെ സമരം കാര്യമായി ബാധിക്കും. ലണ്ടൻ ഹീത്രൂ, മാഞ്ചസ്റ്റർ എന്നിവിടങ്ങളിലേക്ക് ബ്രസൽസ് എയർലൈൻസ് നടത്തുന്ന ഒന്നിലധികം സർവീസുകൾ ഇതിനോടകം റദ്ദാക്കിയിട്ടുണ്ട്. പണിമുടക്ക് ദിനത്തിൽ യുകെയിലേക്കും തിരിച്ചുമുള്ള യാത്രകൾ മുൻകൂട്ടി ആസൂത്രണം ചെയ്തവർക്ക് ഇത് വലിയ തിരിച്ചടിയായി മാറും.
