യുകെയിലെ നിലവിലെ കെയർ വർക്കർമാർക്ക് പുതിയ കുടിയേറ്റ നിയമങ്ങളിൽ ഇളവ് ലഭിച്ചേക്കും

ലണ്ടൻ : യുകെയിൽ ഇതിനകം ജോലി ചെയ്യുന്ന ലക്ഷക്കണക്കിന് കെയർ വർക്കർമാരെ പുതിയ കർശന കുടിയേറ്റ നിയമങ്ങളിൽ നിന്ന് ഒഴിവാക്കുന്നത് പ്രധാനമന്ത്രി ആൻഡി ബേൺഹാം പരിഗണിക്കുന്നതായി റിപ്പോർട്ട്. സ്ഥിരതാമസാവകാശം നേടുന്നതിനുള്ള കാലയളവ് വർധിപ്പിക്കാനുള്ള ഹോം സെക്രട്ടറി ഷബാന മഹ്മൂദിന്റെ പദ്ധതിയിൽ നിലവിലുള്ള കെയർ ജീവനക്കാർക്ക് ഇളവ് നൽകാനാണ് ആലോചന. എന്നാൽ പുതുതായി യുകെയിലെത്തുന്നവർക്ക് കർശന നിയമങ്ങൾ ബാധകമാക്കിയേക്കും. സാമൂഹിക പരിചരണ മേഖലയിലെ കടുത്ത ജീവനക്കാരുടെ ക്ഷാമവും സേവനദാതാക്കൾ നേരിടുന്ന സാമ്പത്തിക പ്രതിസന്ധിയും പരിഗണിച്ചാണ് നീക്കം.

അടുത്ത പൊതുതിരഞ്ഞെടുപ്പിന് മുമ്പ് നാഷണൽ കെയർ സർവീസ് രൂപീകരിക്കുന്നതിനുള്ള നടപടികൾ വേഗത്തിലാക്കുമെന്ന് ബേൺഹാം അടുത്ത ആഴ്ച നടത്തുന്ന പ്രസംഗത്തിൽ പ്രഖ്യാപിക്കുമെന്നാണ് സൂചന. അൽഷിമേഴ്‌സ് ബാധിതനായ പിതാവ് റോയിയിലൂടെ കെയർ സംവിധാനത്തിലെ പ്രശ്നങ്ങൾ നേരിട്ട് അനുഭവിച്ചിട്ടുണ്ടെന്നും നിലവിലെ സംവിധാനം തകർന്ന നിലയിലാണെന്നും ബേൺഹാം നേരത്തെ പറഞ്ഞിരുന്നു. 2028ൽ പൂർത്തിയാക്കാനിരുന്ന ലൂയിസ് കേസിയുടെ സാമൂഹിക പരിചരണ അവലോകനവും നേരത്തെയാക്കാൻ സർക്കാർ തീരുമാനിച്ചേക്കും. കെയർ മേഖലയിലെ പ്രശ്നങ്ങൾ പരിഹരിക്കാൻ തിരഞ്ഞെടുപ്പിന് മുമ്പുതന്നെ ചില പരിഷ്കാരങ്ങൾ നടപ്പാക്കാനാണ് പ്രധാനമന്ത്രിയുടെ ശ്രമം.

കഴിഞ്ഞ അഞ്ചുവർഷത്തിനിടെ ഏകദേശം രണ്ടുലക്ഷം ഹെൽത്ത് ആൻഡ് കെയർ വർക്കർ വിസകളാണ് ഹോം ഓഫീസ് അനുവദിച്ചത്. സ്ഥിരതാമസാവകാശത്തിനുള്ള കാത്തിരിപ്പുകാലം ഇരട്ടിയാക്കുന്നത് ജീവനക്കാരെ യുകെ വിടാൻ നിർബന്ധിതരാക്കുമെന്നും ഇത് രോഗികളുടെയും മുതിർന്നവരുടെയും പരിചരണത്തെ ഗുരുതരമായി ബാധിക്കുമെന്നും യൂണിസൺ ഉൾപ്പെടെയുള്ള സംഘടനകൾ മുന്നറിയിപ്പ് നൽകി. ആശുപത്രിയിൽ നിന്ന് ഡിസ്ചാർജ് ചെയ്യുന്ന രോഗികൾക്ക് സൗജന്യ ഹ്രസ്വകാല പരിചരണം നൽകുന്നതിനായി £9 ബില്യൺ മൂല്യമുള്ള ബെറ്റർ കെയർ ഫണ്ടിലേക്ക് കൂടുതൽ പണം അനുവദിക്കുന്നതും സർക്കാർ പരിഗണിക്കുന്നുണ്ട്. ദീർഘകാല കെയർ സംവിധാനം സ്ഥാപിക്കാൻ അധിക നികുതി ഉൾപ്പെടെയുള്ള ധനസമാഹരണ മാർഗങ്ങളും കേസിയുടെ അവലോകനത്തിൽ പരിശോധിച്ചേക്കും.

English Summary: Existing migrant care workers in the UK could be exempted from tougher settlement rules under plans being considered by Andy Burnham.