ബ്രിട്ടനിൽ ആധുനിക അടിമത്തം റെക്കോർഡ് നിരക്കിൽ; സാങ്കേതികവിദ്യയും ദാരിദ്ര്യവും വില്ലനാകുന്നു

ലണ്ടൻ : ബ്രിട്ടനിൽ ജീവിതച്ചെലവ് വർധിക്കുന്നതും അത്യാധുനിക സാങ്കേതികവിദ്യകളുടെ ദുരുപയോഗവും ആധുനിക അടിമത്തം റെക്കോർഡ് നിരക്കിലെത്തിക്കുന്നതായി പുതിയ റിപ്പോർട്ടുകൾ വ്യക്തമാക്കുന്നു. സ്വതന്ത്ര ആന്റി-സ്ലേവറി കമ്മീഷണർ പുറത്തുവിട്ട കണക്കുകൾ പ്രകാരം 2025-ൽ മാത്രം 23,000-ത്തിലധികം പേരാണ് രാജ്യത്ത് വിവിധ തരത്തിലുള്ള ചൂഷണങ്ങൾക്ക് ഇരയായത്. മുൻവർഷത്തെ അപേക്ഷിച്ച് ചൂഷണത്തിന് ഇരയാകുന്നവരുടെ എണ്ണത്തിൽ 22 ശതമാനം വർധനവുണ്ടായി എന്നത് വിഷയത്തിന്റെ ഗൗരവം വർദ്ധിപ്പിക്കുന്നു. ഇരകളിൽ അഞ്ചിലൊന്ന് പേരും ബ്രിട്ടീഷ് പൗരന്മാരാണെന്ന വസ്തുത ഞെട്ടിക്കുന്നതാണ്. എറിട്രിയ, വിയറ്റ്നാം തുടങ്ങിയ രാജ്യങ്ങളിൽ നിന്നുള്ളവരും ഈ പട്ടികയിൽ മുൻപന്തിയിലുണ്ട്.

ജീവിതച്ചെലവ് ക്രമാതീതമായി വർധിക്കുന്നത് സാധാരണക്കാരെ സാമ്പത്തിക കെണികളിലേക്കും കടബാധ്യതകളിലേക്കും നയിക്കുന്നതാണ് ഈ പ്രതിസന്ധിക്ക് പ്രധാന കാരണം. തൊഴിൽ സുരക്ഷിതത്വമില്ലായ്മ മുതലെടുക്കുന്ന സംഘങ്ങൾ നിർബന്ധിത ജോലിയിലേക്കും മനുഷ്യക്കടത്തിലേക്കും ആളുകളെ തള്ളിയിടുന്നു. നിർമിത ബുദ്ധി ഉൾപ്പെടെയുള്ള ഡിജിറ്റൽ സംവിധാനങ്ങൾ ഉപയോഗിച്ച് ഇരകളെ കണ്ടെത്താനും അവരെ നിയന്ത്രിക്കാനും കുറ്റവാളികൾക്ക് എളുപ്പമാകുന്നതായി റിപ്പോർട്ട് മുന്നറിയിപ്പ് നൽകുന്നു. വീഡിയോ ഗെയിമുകളിലെ ചാറ്റ് റൂമുകൾ വഴി കുട്ടികളെ സ്വാധീനിച്ചാണ് പലപ്പോഴും ഇത്തരം ചൂഷണങ്ങൾ ആരംഭിക്കുന്നത്. ആൺകുട്ടികളെ മയക്കുമരുന്ന് മാഫിയകൾക്കും മറ്റ് കുറ്റകൃത്യങ്ങൾക്കുമായും ഉപയോഗിക്കുമ്പോൾ, പെൺകുട്ടികൾ ക്രൂരമായ ലൈംഗിക ചൂഷണത്തിനാണ് ഇരയാകുന്നത്.

കഴിഞ്ഞ അഞ്ച് വർഷത്തിനിടെ ഇത്തരം കേസുകളിൽ 50 ശതമാനത്തിലധികം വർധനയുണ്ടായ സാഹചര്യത്തിൽ സർക്കാർ അടിയന്തരമായി ഇടപെടണമെന്ന് കമ്മീഷണർ എലീനർ ലിയോൺസ് ആവശ്യപ്പെട്ടു. പൊലീസിന് കൂടുതൽ ഫണ്ട് അനുവദിക്കുന്നതിനൊപ്പം നിയമങ്ങൾ ലംഘിക്കുന്ന ബിസിനസ് സ്ഥാപനങ്ങൾക്കെതിരെ കർശനമായ പിഴ ശിക്ഷകൾ നടപ്പിലാക്കണമെന്നും റിപ്പോർട്ട് ശുപാർശ ചെയ്യുന്നു. വരും വർഷങ്ങളിൽ ഇത്തരം ചൂഷണങ്ങൾ കണ്ടെത്തുക എന്നത് കൂടുതൽ വെല്ലുവിളിയാകുമെന്നും അതിനാൽ ഡിജിറ്റൽ പ്ലാറ്റ്‌ഫോമുകളിൽ നിരീക്ഷണം ശക്തമാക്കേണ്ടത് അത്യാവശ്യമാണെന്നും അധികൃതർ ചൂണ്ടിക്കാട്ടി.