ആദ്യ വീട് വാങ്ങുന്നവർക്ക് നിക്ഷേപമില്ലാതെയും മോർട്ട്ഗേജ്; പുതിയ പദ്ധതികളുമായി ബാങ്കുകൾ

ലണ്ടൻ : ആദ്യമായി വീട് വാങ്ങാൻ ശ്രമിക്കുന്നവർക്ക് വലിയ മുൻകൂർ നിക്ഷേപമില്ലാതെ വായ്പ ലഭ്യമാക്കുന്ന മോർട്ട്ഗേജ് പദ്ധതികൾ ബ്രിട്ടനിൽ വീണ്ടും വർധിക്കുന്നു. മെട്രോ ബാങ്ക് വീടിന്റെ വിലയുടെ 100 ശതമാനം വരെ വായ്പ നൽകുന്ന പദ്ധതി അവതരിപ്പിച്ചിട്ടുണ്ട്. എന്നാൽ അടുത്ത കുടുംബാംഗം സംയുക്ത വായ്പയെടുക്കുന്നയാളായി ചേരണമെന്ന നിബന്ധനയുണ്ട്.

ലോയ്ഡ്സ് ബാങ്ക് കുറഞ്ഞത് 5,000 പൗണ്ട് നിക്ഷേപത്തിൽ ആദ്യ വീട് വാങ്ങുന്നവർക്കായി മോർട്ട്ഗേജ് നൽകുന്നു. സാന്റാൻഡർ 10,000 പൗണ്ട് നിക്ഷേപത്തിൽ വീടിന്റെ വിലയുടെ 98 ശതമാനം വരെ വായ്പ നൽകുന്ന പദ്ധതിയും ലഭ്യമാക്കിയിട്ടുണ്ട്. സ്കിപ്ടൺ ബിൽഡിങ് സൊസൈറ്റി വാടക കൃത്യമായി അടച്ച ചരിത്രമുള്ളവർക്ക് നിക്ഷേപമില്ലാത്ത പദ്ധതിയും, യോർക്‌ഷയർ ബിൽഡിങ് സൊസൈറ്റി 5,000 പൗണ്ട് നിക്ഷേപത്തിൽ 99 ശതമാനം വരെയുള്ള വായ്പയും നൽകുന്നു.

വലിയ നിക്ഷേപം സ്വരൂപിക്കാൻ ബുദ്ധിമുട്ടുന്നവർക്ക് ഈ പദ്ധതികൾ സഹായകരമാണെങ്കിലും പലിശ നിരക്ക് കൂടുതലാകാനും മാസ തിരിച്ചടവ് ഉയരാനും സാധ്യതയുണ്ട്. വീടിന്റെ വില കുറഞ്ഞാൽ വായ്പ വസ്തുവിന്റെ മൂല്യത്തെക്കാൾ കൂടുതലാകുന്ന സാഹചര്യം ഉണ്ടാകാമെന്നും വിദഗ്ധർ മുന്നറിയിപ്പ് നൽകുന്നു. അപേക്ഷിക്കുന്നതിന് മുമ്പ് പലിശ, ഫീസ്, യോഗ്യതാ വ്യവസ്ഥകൾ എന്നിവ കൃത്യമായി പരിശോധിക്കണം.

English Summary: UK lenders are expanding no- and low-deposit mortgage options for first-time buyers, with higher rates and strict conditions.