ഡെവോണിൽ റോയൽ നേവി ഹെലികോപ്റ്റർ തകർന്നു വീണു; രക്ഷാപ്രവർത്തനം തുടരുന്നു

ലണ്ടൻ : യുകെയിലെ ഡെവോണിൽ റോയൽ നേവിയുടെ ഹെലികോപ്റ്റർ തകർന്നു വീണു. ഇന്ന് പുലർച്ചെ നാല് മണിയോടെ ഓക്ഹാംപ്റ്റണ് സമീപമുള്ള സൗർട്ടൺ ഡൗണിലെ ഒരു പാടശേഖരത്താണ് അപകടമുണ്ടായത്. വിവരം അറിഞ്ഞയുടൻ തന്നെ പോലീസും മറ്റ് അടിയന്തര വിഭാഗങ്ങളും സംഭവസ്ഥലത്തെത്തി രക്ഷാപ്രവർത്തനം ആരംഭിച്ചു. സുരക്ഷാ മുൻകരുതലുകളുടെ ഭാഗമായി എ386, എ30 റോഡുകളിലെ ഗതാഗതം പോലീസ് താൽക്കാലികമായി നിരോധിച്ചിരിക്കുകയാണ്. അപകടത്തിൽപ്പെട്ടത് റോയൽ നേവിയുടെ ഹെലികോപ്റ്റർ തന്നെയെന്ന് പ്രതിരോധ മന്ത്രാലയം സ്ഥിരീകരിച്ചിട്ടുണ്ട്.

യൂറോപ്പിലെ തന്നെ ഏറ്റവും വലിയ നാവിക താവളമായ പ്ലിമത്തിലെ എച്ച്.എം.എൻ.ബി ഡെവോൺപോർട്ട് ഉൾപ്പെടെ നിരവധി പ്രമുഖ നാവിക താവളങ്ങൾ സ്ഥിതി ചെയ്യുന്ന ഡാർട്ട്‌മൂറിന് സമീപമാണ് ഈ പ്രദേശം. അപകടത്തിൽപ്പെട്ടത് ഏത് തരം ഹെലികോപ്റ്ററാണെന്ന് ഔദ്യോഗികമായി വെളിപ്പെടുത്തിയിട്ടില്ലെങ്കിലും, റോയൽ നേവി പ്രധാനമായും ഉപയോഗിക്കുന്ന മെർലിൻ അല്ലെങ്കിൽ വൈൽഡ്കാറ്റ് ഇനത്തിൽപ്പെട്ട ഹെലികോപ്റ്ററാകാം ഇതെന്നാണ് സൂചന. അപകടത്തെക്കുറിച്ച് അന്വേഷണം ആരംഭിച്ചതായി റോയൽ നേവി വക്താവ് അറിയിച്ചു.

അപകട കാരണം വ്യക്തമല്ലെങ്കിലും അന്വേഷണം പുരോഗമിക്കുന്നതിനാൽ കൂടുതൽ വിവരങ്ങൾ ഇപ്പോൾ പുറത്തുവിടാനാകില്ലെന്ന് അധികൃതർ വ്യക്തമാക്കി. പരിക്കുകളെക്കുറിച്ചോ നാശനഷ്ടങ്ങളെക്കുറിച്ചോ ഉള്ള കൃത്യമായ വിവരങ്ങൾ ലഭ്യമായിട്ടില്ല. സംഭവത്തെക്കുറിച്ചുള്ള കൂടുതൽ വിവരങ്ങൾ ഉടൻ തന്നെ പുറത്തുവിടുമെന്ന് ഡെവോൺ ആൻഡ് കോൺവാൾ പോലീസ് അറിയിച്ചു.

English Summary: A Royal Navy helicopter crashed in a Devon field early Wednesday morning, triggering an emergency response and investigation.