യുകെയിൽ ചരിത്രത്തിലെ ഏറ്റവും ചൂടേറിയ മേയ് ദിനം; അംബർ അലർട്ട് പ്രഖ്യാപിച്ചു
ലണ്ടൻ : ബ്രിട്ടനിൽ റെക്കോർഡുകൾ ഭേദിച്ച് കടുത്ത ചൂട് തുടരുന്നു. മേയ് മാസത്തിലെ ഏറ്റവും ഉയർന്ന താപനിലയും ചരിത്രത്തിലെ ഏറ്റവും ചൂടേറിയ ബാങ്ക് ഹോളിഡേയും ആണ് രാജ്യം ഇപ്പോൾ സാക്ഷ്യം വഹിക്കുന്നത്. ലണ്ടനിലും തെക്കുകിഴക്കൻ ഇംഗ്ലണ്ടിലും താപനില 35 ഡിഗ്രി സെൽഷ്യസ് വരെ ഉയർന്നേക്കുമെന്നാണ് കാലാവസ്ഥാ നിരീക്ഷണ കേന്ദ്രമായ മെറ്റ് ഓഫീസ് നൽകുന്ന മുന്നറിയിപ്പ്. ഞായറാഴ്ച ലണ്ടനിലെ ക്യൂ ഗാർഡൻസിൽ 32.3 ഡിഗ്രി സെൽഷ്യസ് ചൂട് രേഖപ്പെടുത്തിയിരുന്നു. ഇത് കഴിഞ്ഞ 79 വർഷത്തിനിടയിലെ ഏറ്റവും ഉയർന്ന മേയ് മാസത്തെ താപനിലയാണ്. ഇതിനുപുറമേ കെൻലി എയർഫീൽഡിൽ രാത്രിയിലെ കുറഞ്ഞ താപനില 19.4 ഡിഗ്രി സെൽഷ്യസായി ഉയർന്നതോടെ രാജ്യം ഏറ്റവും ചൂടേറിയ മേയ് രാത്രിയെന്ന റെക്കോർഡും provisionally പിന്നിട്ടു കഴിഞ്ഞു.
കടുത്ത ഉഷ്ണതരംഗം ജനജീവിതത്തെ സാരമായി ബാധിച്ച പശ്ചാത്തലത്തിൽ യുകെ ഹെൽത്ത് സെക്യൂരിറ്റി ഏജൻസി ഇംഗ്ലണ്ടിലുടനീളം ഹീറ്റ് ഹെൽത്ത് അലർട്ടുകൾ പുറപ്പെടുവിച്ചിട്ടുണ്ട്. ലണ്ടൻ, സൗത്ത് ഈസ്റ്റ്, ഈസ്റ്റ് മിഡ്ലാൻഡ്സ് തുടങ്ങിയ മേഖലകളിൽ അതീവ ജാഗ്രത നിർദേശിക്കുന്ന അംബർ അലർട്ടാണ് നിലവിലുള്ളത്. ഉയർന്ന ചൂട് ആരോഗ്യ മേഖലയെയും സാമൂഹിക സേവനങ്ങളെയും പ്രതികൂലമായി ബാധിക്കാൻ സാധ്യതയുണ്ടെന്ന് അധികൃതർ വ്യക്തമാക്കി. പ്രായമായവർക്കും മറ്റ് ആരോഗ്യപ്രശ്നങ്ങൾ ഉള്ളവർക്കും ഈ കാലാവസ്ഥ വലിയ വെല്ലുവിളിയാണ് ഉയർത്തുന്നത്. അത്യാവശ്യ ഘട്ടങ്ങളിൽ അല്ലാതെ പകൽ 11 മണി മുതൽ 3 മണി വരെയുള്ള സമയങ്ങളിൽ പുറത്തിറങ്ങരുതെന്നും ധാരാളം വെള്ളം കുടിക്കണമെന്നും നിർദേശമുണ്ട്.
ലണ്ടൻ ഉൾപ്പെടെയുള്ള ഇംഗ്ലണ്ടിന്റെ ഭൂരിഭാഗം പ്രദേശങ്ങളും കടുത്ത ചൂടിൽ ഉരുകുമ്പോൾ സ്കോട്ട്ലൻഡിന്റെ വടക്കുപടിഞ്ഞാറൻ മേഖലകളിൽ താരതമ്യേന തണുപ്പും മേഘാവൃതവുമായ കാലാവസ്ഥയാണ് അനുഭവപ്പെടുന്നത്. നിലവിലെ ഉഷ്ണതരംഗം വരും ദിവസങ്ങളിലും തുടരുമെന്നാണ് പ്രവചനം. അസാധാരണമായ ഈ കാലാവസ്ഥാ വ്യതിയാനത്തിന് പിന്നിൽ ആഗോള താപനമാണെന്ന ആശങ്ക വിദഗ്ധർ പങ്കുവെക്കുന്നുണ്ട്. ചൂട് വർധിച്ചതോടെ യാത്രാ തടസ്സങ്ങൾക്കും ട്രെയിൻ സർവീസുകൾ റദ്ദാക്കുന്നതിനും സാധ്യതയുണ്ടെന്നും പൊതുജനങ്ങൾ ജാഗ്രത പാലിക്കണമെന്നും മെറ്റ് ഓഫീസ് ഓർമ്മിപ്പിച്ചു.
