വിസ രഹിത യാത്രാ ആനുകൂല്യമുള്ള വിദേശ രാജ്യങ്ങളിൽ നിന്നുള്ളവർക്ക് ഇലക്ട്രോണിക് ട്രാവൽ അതോറൈസേഷൻ നിയമങ്ങൾ കർശനമാക്കി യുകെ അധികൃതർ
യുകെയിലേക്ക് വിസ രഹിത യാത്രാ ആനുകൂല്യമുള്ള വിദേശ രാജ്യങ്ങളിൽ നിന്നുള്ളവർക്ക് ഇലക്ട്രോണിക് ട്രാവൽ അതോറൈസേഷൻ അഥവാ ഇടിഎ ഘട്ടങ്ങളായി നിർബന്ധമാക്കുന്ന സാഹചര്യത്തിൽ പുതിയ നിബന്ധനകളുമായി ഹോം ഓഫീസ് രംഗത്ത്. ബ്രിട്ടീഷ് പൗരത്വത്തിന് അർഹതയുള്ള വിദേശ രാജ്യങ്ങളിലെ യാത്രാക്കാർക്ക് ഇനിമുതൽ കനേഡിയൻ അല്ലെങ്കിൽ ഓസ്ട്രേലിയൻ പാസ്പോർട്ട് ഉപയോഗിച്ച് ഇടിഎ വഴി യുകെയിൽ പ്രവേശിക്കാൻ സാധിക്കില്ലെന്ന് അധികൃതർ വ്യക്തമാക്കി.
1981-ലെ ബ്രിട്ടീഷ് നാഷണാലിറ്റി ആക്ട് പ്രകാരം വിദേശത്ത് ജനിച്ച ആദ്യ തലമുറയിലെ വ്യക്തികൾക്ക് യാതൊരു അപേക്ഷയും കൂടാതെ തന്നെ ബ്രിട്ടീഷ് പൗരത്വം സ്വയമേവ ലഭിക്കുന്നതാണ്. അതുകൊണ്ടുതന്നെ ഇത്തരം ആളുകൾ യുകെയിലേക്ക് യാത്ര ചെയ്യുമ്പോൾ നിർബന്ധമായും ബ്രിട്ടീഷ് പാസ്പോർട്ട് തന്നെ ഉപയോഗിക്കേണ്ടി വരും.
യൂറോപ്യൻ യൂണിയൻ രാജ്യങ്ങളിൽ നിന്നുള്ളവർ ഉൾപ്പെടെ വിസയില്ലാതെ യുകെയിൽ പ്രവേശിക്കാൻ അനുവാദമുള്ള മുഴുവൻ വിദേശ യാത്രക്കാർക്കും ഇടിഎ സംവിധാനം ഘട്ടങ്ങളായി നിർബന്ധമാക്കിയതോടെ പഴയ യാത്രാ രീതികൾ പൂർണ്ണമായും മാറിമറിഞ്ഞു. പുതിയ നിയമപ്രകാരം യുകെയിൽ ജനിച്ചവരോ അല്ലെങ്കിൽ ബ്രിട്ടീഷ് പൗരത്വത്തിന് അർഹതയുള്ളവരോ ആയ ആളുകൾ ബ്രിട്ടീഷ് പാസ്പോർട്ടോ അല്ലെങ്കിൽ ഡിജിറ്റൽ സർട്ടിഫിക്കറ്റ് ഓഫ് എൻടൈറ്റിൽമെന്റോ യാത്രയിൽ ഹാജരാക്കണം.
നിലവിൽ ഇരട്ട പൗരത്വമുള്ളവർക്ക് പാസ്പോർട്ട് പുതുക്കാൻ 12 ആഴ്ചയോളം സമയമെടുക്കുന്നതിനാൽ, 1988-ന് ശേഷം കാലാവധി കഴിഞ്ഞ ബ്രിട്ടീഷ് പാസ്പോർട്ടുകൾ സ്വീകരിക്കാൻ വിമാനക്കമ്പനികൾക്ക് ഹോം ഓഫീസ് താൽക്കാലിക നിർദ്ദേശം നൽകിയിട്ടുണ്ട്.
കാനഡ, ഓസ്ട്രേലിയ തുടങ്ങിയ രാജ്യങ്ങളിലെ ചില പൗരന്മാർ ഇടിഎ ഉപയോഗിച്ച് യുകെയിൽ പ്രവേശിക്കുന്നതായി റിപ്പോർട്ടുകൾ ഉണ്ടെങ്കിലും ഇത് ഭാവിയിൽ നിയമപരമായ തടസ്സങ്ങൾക്ക് കാരണമാകുമെന്ന് വിദഗ്ധർ മുന്നറിയിപ്പ് നൽകുന്നു. തങ്ങൾക്ക് ബ്രിട്ടീഷ് പൗരത്വം ലഭിക്കാൻ യോഗ്യതയുണ്ടോ എന്ന് ഔദ്യോഗിക വെബ്സൈറ്റ് വഴി പരിശോധിക്കേണ്ട ഉത്തരവാദിത്തം യാത്രക്കാർക്ക് തന്നെയാണ്. ആദ്യമായി ബ്രിട്ടീഷ് പാസ്പോർട്ടിന് അപേക്ഷിക്കുന്നവർക്ക് നടപടിക്രമങ്ങൾ പൂർത്തിയാക്കാൻ ആറ് മാസം വരെ സമയമെടുക്കുമെന്നും കൂടുതൽ രേഖകൾ ആവശ്യമായി വരുമെന്നും അധികൃതർ ഓർമ്മിപ്പിക്കുന്നു.
