യുകെ-ഇന്ത്യ വ്യാപാര കരാർ ജൂലൈ 15 മുതൽ; സ്‌കോച്ച് വിസ്‌കി വിലയിൽ കുറവ് പ്രതീക്ഷ

ലണ്ടൻ : ഇന്ത്യയും യുകെയും തമ്മിലുള്ള സ്വതന്ത്ര വ്യാപാര കരാർ ജൂലൈ 15 മുതൽ പ്രാബല്യത്തിൽ വരുന്നതോടെ ഇന്ത്യയിൽ ഇറക്കുമതി ചെയ്യുന്ന സ്‌കോച്ച് വിസ്‌കി, ജിൻ തുടങ്ങിയ വിദേശ മദ്യങ്ങളുടെ വിലയിൽ കുറവുണ്ടാകാൻ സാധ്യത. കരാറിന്റെ ഭാഗമായി നിലവിൽ 150 ശതമാനമുള്ള ഇറക്കുമതി തീരുവ ആദ്യഘട്ടത്തിൽ 75 ശതമാനമായി കുറയും. തുടർന്ന് പത്ത് വർഷത്തിനുള്ളിൽ ഇത് 40 ശതമാനമായി താഴ്ത്താനാണ് തീരുമാനം. എന്നാൽ തീരുവ പകുതിയായി കുറയുന്നുവെന്നതിനാൽ മദ്യവിലയും അതേ തോതിൽ ഉടൻ കുറയുമെന്ന പ്രതീക്ഷ വേണ്ടെന്നാണ് വിപണി വിദഗ്ധരുടെ വിലയിരുത്തൽ.

ഉപഭോക്താവ് കടയിൽ നൽകുന്ന അന്തിമ വിലയിൽ ഇറക്കുമതി തീരുവ ഒരു ഘടകം മാത്രമാണ്. സംസ്ഥാന എക്സൈസ് ഡ്യൂട്ടി, വാറ്റ്, വിതരണ-വ്യാപാര ലാഭവിഹിതം, ഗതാഗതം, പാക്കേജിങ്, മാർക്കറ്റിങ് ചെലവുകൾ എന്നിവയും വില നിർണയത്തിൽ പ്രധാന പങ്ക് വഹിക്കുന്നു. അതിനാൽ വിലക്കുറവ് ഓരോ സംസ്ഥാനത്തും വ്യത്യസ്തമായിരിക്കും. ആദ്യഘട്ടത്തിൽ സ്‌കോച്ച് വിസ്‌കികളുടെ വിലയിൽ ഏകദേശം അഞ്ച് മുതൽ പത്ത് ശതമാനം വരെ കുറവുണ്ടാകാമെന്നാണ് കണക്കാക്കുന്നത്. നികുതി കൂടുതലുള്ള മഹാരാഷ്ട്ര പോലുള്ള സംസ്ഥാനങ്ങളിൽ കുറവ് ഏകദേശം അഞ്ച് ശതമാനത്തിലൊതുങ്ങാൻ സാധ്യതയുള്ളപ്പോൾ, നികുതി കുറവുള്ള ചില സംസ്ഥാനങ്ങളിൽ വിലക്കുറവ് കൂടുതൽ ലഭിക്കാനും സാധ്യതയുണ്ട്.

സ്‌കോട്ട്‌ലൻഡിൽ തന്നെ നിർമിച്ച്, ലേബൽ ചെയ്ത്, കുപ്പിയിലാക്കി ഇന്ത്യയിലേക്ക് നേരിട്ട് ഇറക്കുമതി ചെയ്യുന്ന ‘ബോട്ടിൽഡ്-ഇൻ-ഒറിജിൻ’ സ്‌കോച്ച് വിസ്‌കികൾക്കാണ് വിലക്കുറവിന്റെ കൂടുതൽ നേട്ടം ലഭിക്കാൻ സാധ്യത. അതേസമയം, ബൾക്കായി ഇന്ത്യയിലേക്ക് ഇറക്കുമതി ചെയ്ത് ഇവിടെ കുപ്പിയിലാക്കുന്ന മദ്യങ്ങൾക്ക് വലിയ മാറ്റം ഉടൻ ഉണ്ടാകില്ലെന്നാണ് വിലയിരുത്തൽ. 750 മില്ലിലീറ്റർ ജോണി വാക്കർ ബ്ലാക്ക് ലേബൽ 12 ഇയർ, ഷിവാസ് റീഗൽ 12 ഇയർ തുടങ്ങിയ ബ്രാൻഡുകളുടെ വില അഞ്ച് മുതൽ പത്ത് ശതമാനം വരെ കുറഞ്ഞാൽ ഉപഭോക്താക്കൾക്ക് ഒരു കുപ്പിക്ക് ഏതാനും നൂറ് രൂപ വരെ ലാഭിക്കാനാകും. എങ്കിലും പഴയ സ്റ്റോക്കുകൾ വിറ്റുതീരുകയും പുതിയ വില സംസ്ഥാനങ്ങളിൽ രജിസ്റ്റർ ചെയ്യുകയും ചെയ്തതിന് ശേഷമേ യഥാർത്ഥ വിലക്കുറവ് വിപണിയിൽ പ്രകടമാകൂ. ഇതിന് ആറുമാസം മുതൽ ഒരു വർഷം വരെ സമയമെടുക്കാമെന്നാണ് വിലയിരുത്തൽ.

The India–UK Free Trade Agreement is expected to make imported Scotch whisky and gin cheaper for Indian consumers over time.