ഇറാൻ യുദ്ധം കനത്തതോടെ വിമാന ഇന്ധനത്തിന് ക്ഷാമം; ഗ്ലാസ്ഗോ, എഡിൻബറോ വിമാനത്താവളങ്ങളിൽ സർവീസുകൾ തടസ്സപ്പെട്ടു
ലണ്ടൻ : ഇറാൻ യുദ്ധത്തെ തുടർന്നുണ്ടായ ആഗോള വിമാന ഇന്ധന പ്രതിസന്ധി സ്കോട്ട്ലൻഡിലെ പ്രധാന വിമാനത്താവളങ്ങളുടെ പ്രവർത്തനത്തെ ഗുരുതരമായി ബാധിച്ചു. സ്കോട്ട്ലൻഡിലെ ഏറ്റവും വലിയ വിമാനത്താവളങ്ങളായ എഡിൻബറോ, ഗ്ലാസ്ഗോ എന്നിവിടങ്ങളിൽ നിന്നുള്ള നിരവധി സർവീസുകളാണ് ഇന്ധനക്ഷാമം മൂലം വൈകുകയോ മറ്റ് വിമാനത്താവളങ്ങളിലേക്ക് തിരിച്ചുവിടുകയോ ചെയ്യുന്നത്. മിഡിൽ ഈസ്റ്റിലെ സംഘർഷത്തെ തുടർന്ന് ഹോർമുസ് കടലിടുക്ക് അടച്ചതോടെ അന്താരാഷ്ട്ര വിപണിയിൽ ഏവിയേഷൻ ടർബൈൻ ഫ്യുവലിന്റെ വില കുത്തനെ ഉയരുകയും വിതരണത്തിൽ കടുത്ത പ്രതിമാസം നേരിടുകയും ചെയ്തതാണ് യാത്രാക്ലേശത്തിന് കാരണമായത്. ഇതേത്തുടർന്ന് അവധിക്കാല യാത്രയ്ക്കായി എത്തിയ ആയിരക്കണക്കിന് യാത്രക്കാരാണ് നിലവിൽ വിമാനത്താവളങ്ങളിൽ ദുരിതത്തിലായിരിക്കുന്നത്.
പ്രധാന ഇന്ധന പൈപ്പ്ലൈൻ ശൃംഖലയുമായി ബന്ധിപ്പിക്കാത്തതാണ് സ്കോട്ട്ലൻഡിലെ ഈ രണ്ട് വിമാനത്താവളങ്ങളെയും പ്രതിസന്ധിയിലാക്കിയത്. ഹീത്രു, ഗാറ്റ്വിക്, മാഞ്ചസ്റ്റർ തുടങ്ങിയ പ്രമുഖ യുകെ വിമാനത്താവളങ്ങളിലേക്ക് പൈപ്പ്ലൈൻ വഴി നേരിട്ട് ഇന്ധനമെത്തുമ്പോൾ, എഡിൻബറോയിലേക്കും ഗ്ലാസ്ഗോയിലേക്കും റോഡ് മാർഗ്ഗമാണ് ഇന്ധനം എത്തിക്കുന്നത്. ഇതാണ് വിതരണ ശൃംഖലയിലെ തടസ്സങ്ങൾ ഇവരെ കൂടുതൽ വേഗത്തിൽ ബാധിക്കാൻ കാരണമായത്. പ്രതിസന്ധി രൂക്ഷമായതോടെ ഗ്ലാസ്ഗോയിൽ നിന്നുള്ള ടി യു ഐ വിമാനങ്ങൾ പ്രെസ്റ്റ്വിക്കിൽ ഇറക്കിയാണ് ഇന്ധനം നിറയ്ക്കുന്നത്. എഡിൻബറോയിൽ നിന്ന് ദുബായ്, പാരീസ് എന്നിവിടങ്ങളിലേക്ക് പോകേണ്ട വിമാനങ്ങൾ മാഞ്ചസ്റ്ററിൽ ഇറക്കി ഇന്ധനം നിറച്ച ശേഷമാണ് യാത്ര തുടരുന്നത്.
യൂറോപ്പിലേക്ക് ആവശ്യമായ വിമാന ഇന്ധനത്തിന്റെ പകുതിയോളം മിഡിൽ ഈസ്റ്റിൽ നിന്നാണ് ഇറക്കുമതി ചെയ്യുന്നത് എന്നതിനാൽ നിലവിലെ യുദ്ധസാഹചര്യം വരും ദിവസങ്ങളിലും കനത്ത തിരിച്ചടിയായേക്കും. ഇതിനോടകം തന്നെ ലക്ഷക്കണക്കിന് യാത്രക്കാരെ ബാധിക്കുന്ന തരത്തിൽ പ്രമുഖ എയർലൈനുകൾ ആയിരക്കണക്കിന് സർവീസുകളാണ് റദ്ദാക്കിയിരിക്കുന്നത്. ജർമ്മൻ എയർലൈനായ ലുഫ്താൻസ മാത്രം വരും മാസങ്ങളിലായി ഇരുപതിനായിരത്തോളം സർവീസുകൾ വെട്ടിക്കുറച്ചിട്ടുണ്ട്. നിലവിലെ ഇന്ധന പ്രതിസന്ധി പരിഹരിക്കാൻ വിതരണക്കാർ ശ്രമിച്ചുവരികയാണെന്നും യാത്രക്കാർ തങ്ങളുടെ ഫ്ലൈറ്റ് വിവരങ്ങൾ മുൻകൂട്ടി എയർലൈനുകളുമായി ബന്ധപ്പെട്ട് ഉറപ്പുവരുത്തണമെന്നും എഡിൻബറോ വിമാനത്താവള അധികൃതർ അറിയിച്ചു.
English Summary
Flights from Scotland's major airports are facing severe disruptions and diversions due to a sudden jet fuel shortage triggered by the ongoing conflict in Iran.
