ഇംഗ്ലണ്ടിലെ അധ്യാപകർക്ക് 6.6% ശമ്പള വർധന; ചെലവിന്റെ ഒരു ഭാഗം സ്കൂളുകൾ കണ്ടെത്തണം

ലണ്ടൻ : ഇംഗ്ലണ്ടിലെ അധ്യാപകർക്ക് രണ്ട് വർഷത്തിനിടെ ആകെ 6.6 ശതമാനം ശമ്പള വർധന നടപ്പാക്കാൻ സർക്കാർ തീരുമാനിച്ചു. സ്കൂൾ ടീച്ചേഴ്‌സ് റിവ്യൂ ബോഡിയുടെ ഈ ശുപാർശ അംഗീകരിച്ചതായി വിദ്യാഭ്യാസ സെക്രട്ടറി ബ്രിഡ്ജറ്റ് ഫിലിപ്സൺ ഔദ്യോഗികമായി അറിയിച്ചു. ഇതനുസരിച്ച് ഈ വർഷം സെപ്റ്റംബർ മുതൽ 3.5 ശതമാനവും അടുത്ത വർഷം വീണ്ടും 3 ശതമാനവും ശമ്പള വർധന അധ്യാപകർക്ക് ലഭ്യമാകും. അധ്യാപകരുടെയും അനുബന്ധ ജീവനക്കാരുടെയും ശമ്പള വർധനയ്ക്ക് പിന്തുണയായി സംസ്ഥാന സ്കൂളുകൾക്ക് അടുത്ത രണ്ട് വർഷത്തിനുള്ളിൽ 1.8 ബില്യൺ പൗണ്ട് അധിക ഫണ്ടിംഗ് നൽകുമെന്നും വിദ്യാഭ്യാസ വകുപ്പ് വ്യക്തമാക്കിയിട്ടുണ്ട്.

എന്നാൽ ശമ്പള വർധനയുടെ മുഴുവൻ തുകയും സർക്കാർ വഹിക്കാത്തത് സ്കൂൾ മാനേജ്‌മെന്റുകൾക്കും യൂണിയനുകൾക്കും വലിയ ആശങ്കയ്ക്ക് കാരണമായിട്ടുണ്ട്. ശമ്പള വർധന പണപ്പെരുപ്പ നിരക്കിനേക്കാൾ കൂടുതലാണെന്നത് ആശ്വാസകരമാണെങ്കിലും, ആവശ്യമായി വരുന്ന തുകയുടെ മൂന്നിലൊന്ന് ഭാഗം സ്കൂളുകൾ സ്വന്തം ബജറ്റിൽ നിന്ന് തന്നെ കണ്ടെത്തേണ്ടി വരും. നാഷണൽ എഡ്യൂക്കേഷൻ യൂണിയന്റെ കണക്കുകൾ പ്രകാരം സ്കൂളുകൾക്ക് ഇതിനായി ഏകദേശം 460 മില്യൺ പൗണ്ട് മാറ്റിവെക്കേണ്ടി വരും. ഇത് വരും ദിവസങ്ങളിൽ അധ്യാപകരുടെയും സഹായ ജീവനക്കാരുടെയും എണ്ണം കുറയ്ക്കാൻ ഇടയാക്കുമെന്ന ആശങ്കയും യൂണിയനുകൾ പങ്കുവെക്കുന്നു.

പുതിയ മാറ്റത്തോടെ സെപ്റ്റംബർ മുതൽ അധ്യാപകരുടെ ശരാശരി ശമ്പളം 52,800 പൗണ്ടിന് മുകളിലേക്കും അടുത്ത വർഷം സെപ്റ്റംബർ മുതൽ 54,400 പൗണ്ടിന് മുകളിലേക്കും ഉയരുമെന്നാണ് കണക്കാക്കുന്നത്. കോളേജുകൾക്കും മറ്റ് തുടർ വിദ്യാഭ്യാസ സ്ഥാപനങ്ങൾക്കും ജീവനക്കാരെ നിലനിർത്താനായി 485 മില്യൺ പൗണ്ടിന്റെ അധിക സഹായവും പ്രഖ്യാപിച്ചിട്ടുണ്ട്. ഇതോടൊപ്പം അക്കാദമി സ്കൂൾ മേധാവികളുടെ ഉയർന്ന ശമ്പളത്തിന് സർക്കാർ പുതിയ നിയന്ത്രണം ഏർപ്പെടുത്തി. ഇനി മുതൽ 174,000 പൗണ്ടിന് മുകളിലുള്ള ഉയർന്ന ശമ്പളങ്ങൾക്ക് സർക്കാരിന്റെ പ്രത്യേക അനുമതി നിർബന്ധമാക്കും.

English Summary: Teachers in England will receive a 6.6% pay rise over two years, but schools will have to cover part of the cost.