യുകെ-ഫ്രാൻസ് അതിർത്തിയിൽ യാത്രാദുരിതം: ഡോവർ തുറമുഖത്തെ പുതിയ ഇയു പരിശോധനകൾ ഫ്രഞ്ച് അധികൃതർ താൽക്കാലികമായി നിർത്തിവെച്ചു
ലണ്ടൻ : യൂറോപ്യൻ യൂണിയന്റെ പുതിയ അതിർത്തി പരിശോധനകൾ കാരണം കടുത്ത യാത്രാദുരിതം ഉണ്ടായതിനെ തുടർന്ന് യുകെയിലെ ഡോവർ തുറമുഖത്ത് ഏർപ്പെടുത്തിയിരുന്ന കർശന നിയന്ത്രണങ്ങൾ ഫ്രഞ്ച് അധികൃതർ താൽക്കാലികമായി നിർത്തിവെച്ചു. ഷെഞ്ചൻ മേഖലയിലേക്ക് പ്രവേശിക്കുന്നവർക്കായി പുതുതായി നടപ്പിലാക്കിയ എൻട്രി എക്സിറ്റ് സിസ്റ്റം ആണ് ആദ്യദിനം തന്നെ വൻ ഗതാഗതക്കുരുക്കിന് കാരണമായത്. ബാങ്ക് ഹോളിഡേ വാരാന്ത്യത്തിലെ കടുത്ത ചൂടിൽ നാല് മണിക്കൂറിലധികം യാത്രക്കാർക്ക് ക്യൂവിൽ കാത്തുനിൽക്കേണ്ടി വന്നതോടെയാണ് അടിയന്തര ഇളവുകൾ പ്രഖ്യാപിക്കാൻ അധികൃതർ നിർബന്ധിതരായത്.
യുകെ ഉൾപ്പെടെയുള്ള യൂറോപ്യൻ യൂണിയന് പുറത്തുള്ള രാജ്യങ്ങളിൽ നിന്നുള്ള യാത്രക്കാരുടെ വിരലടയാളവും ചിത്രങ്ങളും ശേഖരിക്കുന്ന പുതിയ ഡിജിറ്റൽ സംവിധാനത്തിന്റെ സാങ്കേതിക തകരാറുകളാണ് ഡോവറിൽ പ്രതിസന്ധി സൃഷ്ടിച്ചത്. ആവശ്യമായ ഫ്രഞ്ച് സാങ്കേതിക ഉപകരണങ്ങൾ ലഭ്യമാകാത്തതിനാൽ അതിർത്തി സുരക്ഷാ ഉദ്യോഗസ്ഥർ യാത്രക്കാരുടെ വിവരങ്ങൾ നേരിട്ട് രേഖപ്പെടുത്തേണ്ടി വന്നത് താമസം വർദ്ധിപ്പിച്ചു. പതിനായിരക്കണക്കിന് ആളുകൾ ഒരേസമയം എത്തിയതോടെ തുറമുഖത്തേക്കുള്ള പ്രധാന റോഡുകളിലും കിലോമീറ്ററുകളോളം നീളത്തിൽ വാഹനങ്ങളുടെ വലിയ നിരയാണ് രൂപപ്പെട്ടത്.
യാത്രാക്ലേശം രൂക്ഷമായതോടെ ഇയു നിബന്ധനകളിലെ പ്രത്യേക വ്യവസ്ഥ പ്രകാരം ഫ്രഞ്ച് അതിർത്തി സുരക്ഷാ വിഭാഗം പരിശോധനകളിൽ താൽക്കാലിക ഇളവ് അനുവദിക്കുകയായിരുന്നു. പരമ്പരാഗത രീതിയിലുള്ള സാധാരണ പരിശോധനകൾ തുടരുമെങ്കിലും പുതിയ ഡിജിറ്റൽ വിവരശേഖരണം ഒഴിവാക്കിയതോടെ യാത്രാസമയം ഗണ്യമായി കുറഞ്ഞിട്ടുണ്ട്. ഇതോടൊപ്പം വാരാന്ത്യത്തിൽ യുകെയിലെ വിവിധ റെയിൽവേ പാതകളിൽ ജീവനക്കാരുടെ പണിമുടക്കും അറ്റകുറ്റപ്പണികളും നടക്കുന്നതിനാൽ രാജ്യത്തുടനീളം വലിയ യാത്രാ തടസ്സങ്ങൾ ഉണ്ടാകുമെന്നാണ് റിപ്പോർട്ടുകൾ.
